- Dépêche -
Delwenn Yann-Baol II lidet war un ton bras e Ploermael
D'ar Sul 10 a viz Kerzu e oa bet lidet an delwenn e Ploermael, a-benn ar fin. Un nebeud tud o deus manifestet sioul. D'ar memes koulz e kinnige ar strollad a-enep delwenn Yann-Baol II un diviz en Algam a-benn kas pelloc'h o stourm evit al laikelezh.
Par Gwenael Dage pour Ya ! le 20/12/06 18:47

Didrabas e oa deuet maer Ploermael, Paul Anselin (UMP), a-benn da lidañ delwenn vras Yann-Baol II d'ar Sul 10 a viz Kerzu a-benn ar fin. War un ton bras eo bet kaset ar gouel en-dro gantañ hag e vignon Zurab Tsereteli, en deus kizellet an oberenn, ha gant bagad ar gêr, zoken. N'int ket bet gwall zirenket gant ar vanifesterien a zo savet a-enep an delwenn-se, difennet ma oa bet oute da dostaat ouzh an darvoud. Er memes koulz e oa bet aozet un diviz en Algam, ur gêrig just e-kichen Ploermael, gant ar strollad "a-enep delwenn Yann-Baol II".

Diwar guzul fur Laurent Ruquier, animatour an abadenn "On a tout essayé" war France 2, en deus kavet gwelloc'h Paul Anselin lidañ e zelwenn d'an 10 a viz Kerzu kentoc'h evit d'an 9, deiz-ha-bloaz lezenn 1905 a zispartie an Iliz diouzh ar Stad. Ur mil a dud bennak eo, memestra, a oa en em vodet war ar blasenn nevez anvet "Plasenn Yann-Baol II" evit kemer perzh er gouel. "Fromet-bras on o welet oc'h deuet ken niverus" emezañ dezhe ha d'an nebeud pennoù-bras o doa asantet d'e bedadenn, an Aotrou Centène, Eskob Gwened, Herve De Charette, Koñsul Bro-Bolonia, ha dileuridi eus meur a relijion en o zouez. "Gourc'hemennet 'm eus an delwenn-mañ evit enoriñ ur penn-bras en Istor, bet difennet groñs gantañ Gwirioù Mab-Den hag ar peoc'h er bed" a zispleg an Aotrou Anselin. "Meurdezus eo an oberenn. Gant al lec'h-mañ e vo diskouezet sklaer spered kêr-Bloermael !" Goude bezañ meulet "Bro-Rusia beurbadus, rekis anezhi evit derc'hel da gempouez ar bed" en deus klozet al lid gant ur bedenn : "Me ho ped, Tad Santel, ra vezo gwarezet ganeoc'h Breizh ho kar..." Ha da echuiñ, a-raok dioueliañ an oberenn, gant ar frazenn a oa bet disklêriet gant Yann-Baol II pa oa bet dilennet : "Arabat deoc'h kaout aon."

Enebourien an delwenn ne chomont ket mut Daoust d'al lid bezañ bet sioul a-walc'h war ar blasenn, c'hoant 'zo deuet da lod da ziskouez n'eo ket an holl dud a-du gant an delwenn-se, savet war ur blasenn bublik. Furlukined ar BAC (Brigade Activiste des Clowns) o deus manifestet war un ton farsus e kreiz-kêr. Un dek bennak e oant. Hogen miret 'zo bet oute da dostaat re ouzh ar blasenn nevez gant poliserien hag a oa deuet en arbenn dezhe 200 metr pelloc'h. Deus o zu o doa kavet gwelloc'h izili ar strollad "a-enep delwenn Yann-Baol II" aozañ un diviz e bourc'h Algam, d'ar memes koulz, kement ha displegañ istor an afer d'an holl, ha da lakaat war wel "divizoù direizh ar C'huzul-Kêr" hervez Marylène Guillaume, dileuriadez ar strollad : "War dachenn al lezennoù e fell deomp stourm. Fae a vez graet oute sklaer ha fraezh gant an aotrou maer" emezi. "Den ne c'hell sevel monumantoù relijiel gant arc'hant publik !" Klemm o deus savet ouzh lezioù-barn Gwened ha Roazhon. Hogen, nac'het o deus ar re-mañ divizout war zigarez ne oa ket mallus an afer. E-sell emaint da glemm ouzh ar C'huzul-Stad, neuze, dezhañ da reiñ e ali war emzalc'h an div lez-varn. Ur c'hlemm all a vo kaset da lez-varn velestradurel Roazhon gant un teuliad kreñvoc'h ha klokoc'h. "Betek penn e stourmimp, ken na vo doujet d'al lezennoù laik !" a asur an itron Guillaume. Bep a lizher kelaouiñ a zo bet kaset da 577 kannad ar VodadennVroadel. "Meur a respont frealzus hon eus bet dija, a-berzh kannaded eus strolladoù disheñvel hag o deus prometet harpañ ac'hanomp." Hag en o zouez hini an aotrou Loïc Bouvard, kannad UMP takad Ploermael. Hervezañ, "n'eo brav e vefe dalc'het d'ur monumant hag a laka reuz er boblañs. Atahinerezh eo en ur mod. N'on ket evit bezañ a-du gant an dra-se."

Tsereteli keodedour a enor D'an derc'hent e oa bet degemeret Zurab Tsereteli gant Paul Anselin en Ti-kêr goude bezañ badezet ar c'hroashent-tro a vo anvet diouzh an arzour. Warnañ e vo savet un obeliskenn kizellet gant hemañ ivez. Stad ennañ en deus kemennet Paul Anselin e oa Ploarmael hiviziken unan eus ar c'hêrioù bras o deus degemeret un oberenn gant Tsereteli, evel Moskou, Tel-Aviv pe New York. Resevet en deus ar Rusad Skoed Aour Kêr-Bloermael. "Seurt enor na vez ket graet da galz a dud, nemet d'ar re o deus roet ur servij a-bouez d'ar gêr. Hag ouzhpenn-se, n'eo ket bet votet an diviz-mañ gant ar C'huzul-kêr !" a resisa Marylène Guillaume. En e brezegenn, Zurab Tsererteli en deus graet-eñ anv eus ur gêr brav-meurbet, eus ur boblañs vadelezhus hag eus ur maer dibar. ABP/Ya !

Voir aussi sur le même sujet :
logo
[ Gwelout pennadoù all Ya !]
Vos 0 commentaires
Commenter :
Votre email est optionnel et restera confidentiel. Il ne sera utilisé que si vous voulez une réponse d'un lecteur via email. Par exemple si vous cherchez un co-voiturage pour cet évènement ou autre chose.
ANTI-SPAM : Combien font ( 2 multiplié par 0) ?

ABP

  • Diwar-benn
  • Darempred
  • Menegoù hervez lezenn
  • Données personnelles
  • Mise en page
  • Ligne éditoriale
  • Sur wikipédia

    • Agir

  • Demander une accréditation
  • Contacter la rédaction
  • Poster votre communiqué vous même
  • Écrire une dépêche
  • Envoyer un flash info

    • Nous suivre

    2003-2024 © Agence Bretagne Presse, sauf Creative Commons