S'accréditer |
S'abonner |
Se connecter |
Faire un donS'accréditer |
S'abonner |
Se connecter |
Faire un don
Wikipedia eo ar 51añ yezh o tizhout 30 00 pennad. Abaoe disul tremenet (an devez ma 'z eo bet tizhet ar vevenn-se) ' zo bet savet 100 pennad, ar pezh a ziskouez ul lusk hag ur youl divent. Kavout a reer kelennerien brezhoneg a-bep seurt (skolaj, skol-veur...), liseidi o vouetañ bemdez Wikipedia e brezhoneg. Evit an titouriñ e ra an dud gant ar wikipediaoù all, pe gant o gouiziegezhioù personel, pe c'hoazh gant levrioù pe dielloù, met hep adkopiañ an destenn dre ma 'z eus ur c'hopyright warno avat.
Setu pemp lisead Diwan Karaez, o skrivañ pennadoù ingal abaoe ar bloavezh paseet, ha mennet d'hen ober. Atersadenn gant Yves-Marie ha Gwen.
- Pet pennad ho peus skrivet, c'hwi ar pemp paotr Termen S, abaoe ar c'hentañ klas ?
- Evit ar re all n'ouzon ket re met krouet am eus 20 pennad klok ha div a chom din da echuiñ evit ar poent. - Diaes eo gouzout resis pet pennad dre ma ne vezont ket listennet. Ouzhpenn ez eus al labour reizhañ, klokaat hag a zo pouezus ivez. Ez personel e blij din kentoc'h klokaat ar pennadoù eget skrivañ reoù nevez bemdez. (Listenn ar penadoù : (voir le site) Met fazioù e leizh a ran hag a zo peurvuiañ reizhet gant an implijerien all, se eo spered wikipedia, an holl a c'hell cheñch pe reizhañ pennadoù savet gant tud all !
- Petra a zegas deoc'h tremen kement a amzer dirak ho urzhiataer evit skrivañ pennadoù Wikipedia ?
- Tremen amzer dirak un urzhiataer dija ! Ober a ra vad pa z'on o labourat start ha dizehan a-hed ar sizhunvezh el lise. Plijus eo ouzhpenn da-se, desket e vez kalz a zraoù o sevel pe o treiñ ar pennadoù hag ouzhpenn e reomp traoù evit ar yezh !
- Me 'zo mennet da skrivañ pennadoù dre ma gas war-raok ar brezhoneg hag un doare "vitrine" e c'hellfe dont da vezañ. Me 'm eus desket kalz a fed danvez ar pennadoù. Met ivez a fed brezhoneg dre ma n'on ket direbech a fed yezh ha me 'zo bet plijet kalz p'o deus kenlabourerien 'zo displeget din reolennoù 'zo, penaos skrivañ ger-mañ ger hag all.
- Hag eñ 'peus darempredoù gant ho lennerien ?
- Hini ebet gant tud estren eus ar wikipedia, siwazh...
- Alas n'ouzon ket resis petra soñj al lennerien. Met gouzout a reomp memestra e vez lennet ar pennadoù pe e vezont implijet gant tud o teskiñ (dre ar gelennerien).
- Peseurt alioù fur e rofec'h d'ar re n'o deus ket implijet Wikipedia c'hoazh ?
- N'omp ket amañ abaoe pell a-walc'h evit bezañ anavezet deroù wikipedia, met war a seblant e oa fall ar brezhoneg er pennkentañ, un doare brezhoneg-galleg. Ha reuzeudig e oa. A-fed danvez ez eo hervez ar pezh a blij d'an dud. Ni hon eus da skouer unan a ra war-dro al loened, unan all war-dro an Istor, re all war bro Alamagn ha tro war dro, pe c'hoazh war an urzhiataerezh... Digor-tre eo wikipedia ha d'an holl. Un doare kumuniezh eo, ul lec'h a zo graet evit an eskemmoù ha pep implijer en deus ur bajenn aozeaden e lec'h ma c'hell sevel an dud goulennoù digant ar re all.
- N'eo morse re ziwezhat, aes eo da zeskiñ ha ma ouioc'h skrivañ e brezhoneg ez eus tu deoc'h skrivañ war Wikipedia. Padal, un tamm amzer ' vo lakaet moarvat evit mestroniañ an holl kodoù...
- Merzhet hon eus ne veze ket adimplijet labour ar skolaijidi hag al liseidi (an teuliadoù dre skrid), padal o deus graet al labour treiñ ha frammañ. Dre-se hon eus c'hoant klask implij an danvez-se, neuze e klaskomp pe broudañ wikipedia er skolajoù (evit ma lakfe an dud an danvez war wikipedia) pe mod all em eus krouet ur chomlec'h e-mail ( wikipedia.bzg [at] free.fr). Ar skolidi a c'hell kas deomp an teuliadoù e stumm bizskrivet ha goude e raimp ni al labour adframmañ, urzhiañ, reiñ ur stumm holloueziadurel d'an danvez ha lakaat war wikipedia e brezhoneg. Gellout a ra an holl dud hag o defe pennadoù e brezhoneg kas anezho deomp hag e rimp-ni al labour goude (diwall : arabat eo kas traoù copyright, gant gwirioù miret, hepken danvez dieub). Va ali a vefe lenn mat ar pajennoù evit ar re a grog (displeget e vez pep tra) ha chom hep kaout aon sevel goulennoù !
Vidéos
Newsletters
Flux RSS - français
ABP sur Facebook
ABP sur X
Chaîne Youtube ABP