LBDH : Pa vez taget glad Breizh gant itron vaer Montroulez

Dre ar gemennadenn-mañ ec'h embann LBDH ez eo kenskoazell gant holl dud « skol Diwan Montroulez (bugale, implijidi, tud ar vugale…), hag a zo en arvar er mare-mañ evit ar

Dre ar gemennadenn-mañ ec'h embann LBDH ez eo kenskoazell gant holl dud « skol Diwan Montroulez (bugale, implijidi, tud ar vugale…), hag a zo en arvar er mare-mañ evit ar pezh a sell ouzh o zi-skol, abalamour d'un diviz bet kemeret gant maerez (tu dehou) ar gêr-se. »

Merzout a reer ez eo bet kemeret an diviz-se un nebeud deizioù goude ma vefe bet paket fall Marc le Fur gant jakobined washañ e strollad politikel e-pad an diviz diwar-benn ar yezhoù rannvro bet aozet er voadeg vroadel. Gwir eo ez eo bet degemeret ar reizhadenn diwar-benn ar yezhoù rannvro gant ar vodadeg vroadel, met dav eo kadarnaat anezhi er c'hendalc'h, ha n'eo ket gant ar reizhadenn-se e vo saveteet ar brezhoneg. Kalz muioc'h emeur o c'hortoz.

Chañsoù zo e profitfe Marc le Fur evit embann krenn-ha-krak e skoazell d'ar skol dre soubidigezh, nemet ma vefe graet kemend-all abretoc'h gant Jean-Jacques Urvoas, e anv ar PS. Na pet gwech hon eus lavaret e talveze lakaat ar brezhoneg da c'hlad « da vezañ sur, da viken, ez afe da get, pe e teufe da vezañ ur seurt mirdi. War a seblant e fell da itron vaer Montroulez mont war an tu-se, hag en ober buan ouzhpenn. » Merzout a reomp ivez n'eus tamm rann ebet er strolladoù politikerezh gall pa vez anv eus kelenn ar brezhoneg : tu dehoù pe tu kleiz, holl asambles ! Skouerioù all a zo bet n'eus ket pell zo : er Chapel Nevez (skol Diwan), e Lannuon ( evit a sell ouzh an anvioù-lec'h) pe e Douarnenez (digeriñ ur rann divyezhek en un eil skol bublik). Ha c'hoazh, kalz hiroc'h eo al listenn.

Pa vez anv a zifenn ar republik c'hall e vez aozet ur gwir dalbenn vroadel, memes ma ranker tremen e-bioù d'an emglevioù etrevroadel ha ne vezont na sinet na kadarnaet gant ar stad c'hall, evel 30vet mellad Kenemglev etrevroadel gwirioù ar vugale, meneget ennañ : « er Stadoù enno minorelezhioù dibar a-fet etniezh, relijion pe yezh pe henvroidi, ne c'haller ket mirout ouzh bugale ar strolladoù tud-se a gaout gwir da gaout o sevenadur dezho, o relijion dezho, ha da implij o yezh gant holl izili all o strollad. » Pa ouezer e vo ar stad c'hall e penn Unvaniezh Europa a-benn nebeut, ez eus peadra da soñjal « ne chom tamm kred ebet d'ur stad he deus paket kement a zale e-keñver doujañ ouzh ar minorelezhioù hag o yezhoù. »

E anv LBDH M. Herjean