ABP

- Reportage -

Teir maouez gant ur vouezh aour

Brudet int abaoe pell. Met nevez ha fresk evel ur prad e miz Mae eo an abadenn o deus kinniget an teir vorganez dec'h.

Par Fanny Chauffin pour ABP le 11/08/10 1:38

Ul laouenan, un durzhunell, ur c'hazh, ur yar ... C'Hoari a ra an teir c'hanerez gant paozioù ar sonennoù hengounel emaint o kanañ. Un ton disheñvel, ur c'han ha diskan o cheñch kanerez bep tro. Ur gontadenn gant mab ar roue lazhet gant e vreur ...

Fent, kempouezh eo plas pep hini gant ur personelezh disheñvel-tre : Annie leun a startijenn miret, Marthe o c'hoari gant he blev hir, doare moue ur vorganez, ha Nolwenn, mousc'hoarzhus hag o reiñ un tañva deus bro Wened gant ar pezh a vez kanet ganti.

Laouen kenañ oa an dud en Oriant o selaou an teir flac'h, o tougen uhel an hengoun kanet e Breizh. Enoret o deus an itron Bertrand (kanet e oa Skolvan gant Marthe) ha Manu Kerjean, gant ur polka.

Krouet o doa doareoù nevez da ganañ gant ur vouezh disheñvel evit pep hini. Plas a oa ivez evit mod kanañ pep arzourez, gwerzioù hir ne vezont ket klevet kalz hiziv an deiz, istorioù o tont deus pell.

E fin an abadenn, galvet adarre, goude ur gavotenn, kuitaet o deus an arvesterien gant ur ganaouenn e galleg, Marthe o seniñ piano war ur veñveg e plastik, ur c'hoariell, hag e oa an teir o sellout ouzh an dud, en o sav, pell-tre deus istorioù folkloraj an nozvezh-mañ servijet war France Inter da un eur noz evit enoriñ ar Festival sañset.

Breizh o krouiñ gant gwirioù don, setu ar pezh a zo bet klevet gant ar re o deus bet ar chans da selaou anezho.

Youtuberez, kazetennerez evit Ya, Ar Men, an Abp, kelennerez, komedianez, kanerez, konterez, filmourez, ha stourmerez war dachenn ar repuidi, gwirioù mabden, ar brezhoneg, an endro e Breizh. E penn aozadur Kan ar bobl bro Kemperle, kenstrivadeg Priz ar Vugale ha Priz ar Yaouankiz, kenstrivadeg haiku Taol Kurun, bet renerez ar festival pad ugent vloaz....

[ Gwelout pennadoù all gant Fanny Chauffin]

Put your name here

ABP

Agir

Nous suivre