Ya d'ar brezhoneg e Kerien

Sinet eo bet ar garta Ya d'ar brezhoneg gant ar maer, an ao. Marcel Moysan d'ar Gwener 1añ a viz C'hwevrer 2008 dirak an It. Lena Louarn, prezidantez Ofis ar Brezhoneg, an Ao. Roger Colas, maer Tremeven-Kemperle bet o sinañ ar garta 2 vloaz 'zo c'hoazh, ar c'huzul-kêr hag

Sinet eo bet ar garta Ya d'ar brezhoneg gant ar maer, an ao. Marcel Moysan d'ar Gwener 1añ a viz C'hwevrer 2008 dirak an It. Lena Louarn, prezidantez Ofis ar Brezhoneg, an Ao. Roger Colas, maer Tremeven-Kemperle bet o sinañ ar garta 2 vloaz 'zo c'hoazh, ar c'huzul-kêr hag un toullad tud eus ar vro.

Kendrec'het mat eo skipailh an ti-kêr eo poent d'ar gumun kemer perzh gant skoazell an Ofis er garta Ya d'ar brezhoneg hag embannet sklaer eo bet ar soñj-se e prezegenn ar maer, bet kaset e brezhoneg gantañ.

Ur skouer eo Marsel Moysan evit e velestridi ouzhpenn-se peogwir eo kelenner war ar brezhoneg gant Mervent, framm kelenn staliet e Pluneour –Lanwern.

Tri bloaz en deus divizet ar gumun kemer evit kas da benn 12 ober a-benn tizhout label live 2 ar garta.

Lakaat ar brezhoneg war wel ha aes da gompren gant an holl eo pal skipailh an Ti-kêr. Dibabet o deus lakaat neuze panelloù divyezhek ouzhpenn ar re a lakaer evit mont e-barzh hag e-maez ar gumun. An holl bedadennoù d'an abadennoù aozet gant an Ti-kêr, ar responterez, kartennoù-bizit an dilennidi, ar paper lizher ha logo ar gumun a vo divyezhek a-benn nebeut. Tu vo, d'an holl re a fello dezho, eureudiñ e brezhoneg. Kemer a raio perzh Kerien e koulzad brudañ bloaziek ar c'helenn d'an dud deuet. Goulennet he deus mod-all e vefe kaset da benn ur studiadenn war hec'h anvioù-lec'h hag an holl logelloù a gaver war dachenn ar gumun gant servij Glad yezhel an Ofis.