Put your name here

connexionS'accréditer | S'abonner | Se connecter | Faire un don
> Logo ABP
ABP e brezhoneg | ABP in English |
- Interview -
Treizerien soñjoù : 400 den, 180 treizher o kemer perzh

Aozerez Treizerien soñjoù eo Pauline Kerscaven abaoe daou vloaz. Ret eo dezhi kalonekaat an dud, prientiñ an abadenn a vo e miz Even e Laz, lakaat war-wel tout an dud o deus dibabet krouiñ liammoù etre ar vrezhonegerien a-vihanik hag ar re yaouankañ o teskiñ ar brezhoneg.

Fanny Chauffin pour ABP le 22/03/11 23:52

ABP - Pet raktres a zo er bloaz-mañ ?

PK- 20 follenn enskrivañ a zo bet resevet gant ar C'huzul-departamant dija. Muioc'h eget 400 skoliad a gemer perzh ha tost 180 treizher.

Tri raktres a zo bet savet pe gant ur skol-vamm pe gant ur skol kentañ derez, 10 a zo war ar stern er skolajoù hag ur raktres en ul lise.

Gant tri zi-retred ez eus douget ur raktres ivez, ha tri all zo douget gant kevredigezhoù.

Met n'eo ket echu ! Tu zo da lakaat hoc'h anv betek ar 15 a viz Ebrel. Ha d'am soñj vo c'hoazh ur bern tud hag a leunio follennoù enskrivañ.

ABP - Petra a zegas seurt abadennoù d'ar vugale ?

PK- An abadennoù-se a zo dedennus-kenañ evit ar vugale. Deskiñ a reont gerioù nevez ha tapout a reont pouez-mouezh ar vro.

Ouzhpenn-se e kejont ouzh brezhonegerien nevez, ha se a ziskouez dezho eo bev c'hoazh ar yezh. Evit an dreizherien soñjoù, etrezo ur bern tud kozh, e tegas kalz ivez an emvodoù gant tud yaouank. Ar pal eo lakaat anezho da dreuzkas ar yezh en-dro.

Ha se a ra vad dezho.

ABP- Hag e vo graet ur gouel evel er bloaz paseet e Laz ?

PK - Evel-just ! Bep bloaz vez graet ur fest evit tout ar re o deus kemeret perzh, ar glaskerien hag an dreizherien met ivez ar gelennerien, animatourien an tiez retred pe tud all.

Er bloaz-mañ vo aozet goude lein d'ar Gwener 10 a viz Even. Ha kement a blijadur oa bet er bloaz paseet e Laz, ken hon eus divizet ober en-dro en toull noz Le Point De Vue.

Ur abadenn sonerezh vo kinniget d'an dud. Kris Menn a zo bet pedet da zont !

ABP- Ar brezhoneg : penaos e ra ar re yaouank evit kompren ur brezhoneg lec'hel ? Piv a sikour anezho ?

PK- Gwir eo a-wezhioù eo diaes en em gompren. Setu perak e vez goulennet gant an dreizherien komz goustadikoc'h pe displegañ ar gerioù diaes.

Strivoù a ra ivez ar re yaouank a-benn bezañ komprenet gant ar re gozh. Mod all, mat eo adlavarout betek bezañ komprenet !

Forzh penaos, ar gelennerien, an animatourien pe tud a-youl-vat a zo aze evit sikour anezho.

Kinnig a reomp ivez tud hag a ra ar bazh-valan (e galleg “médiateur linguistique” etre an daou rummad). E  Pont-'n-Abad da skouer, e ya ur c'helenner eus Mervent d'an emvodoù etre ar vugale ha re gozh un ti retred.

ABP- Gallout a rez kontañ deomp raktres ur skol pe ur skolaj a gavez arouezius eus ar pezh a vefe mat da gaout e pep lec'h ?

E Lanmeur ez eus liammoù kreñv etre animatour an ospital ha kelennerien ar skol divyezhek. Abaoe ar bloaz tremenet e vez savet traoù. Kazi bep miz e ya ar skolidi da welet ar re gozh. Er mare-mañ emaint o sevel ul liorzh asambles.

Komprenet e oa bet gant tud an ospital e oa pouezus-kenañ evit ar vrezhonegerien divizout e brezhoneg gant ar re yaouank. Hatud ar skol zo dedennet gant ar pezh a zo kinniget.

D'am soñj, seurt liammoù eo an dra bouezusañ. Labourat asambles, en ur gumun, se eo dazont Klaskerien ha Treizherien soñjoù.

Voir aussi :
mailbox
Cet article a fait l'objet de 1234 lectures.
Youtubeuse, docteure d'Etat en breton-celtique à l'Université Rennes 2 / Haute Bretagne, enseignante, militante des droits humains à Cent pour un toit Pays de Quimperlé, des langues de Bretagne avec Diwan, Aita, GBB, ...., féministe, enseignante, vidéaste, réalisatrice, conteuse, chanteuse, comédienne amateure, responsable depuis vingt ans du concours de haikus de Taol Kurun, des prix littéraires Priz ar Vugale et Priz ar Yaouankiz, ...
Voir tous les articles de de Fanny Chauffin
Vos 0 commentaires
Commenter :
Votre email est optionnel et restera confidentiel. Il ne sera utilisé que si vous voulez une réponse d'un lecteur via email. Par exemple si vous cherchez un co-voiturage pour cet évènement ou autre chose.
ANTI-SPAM : Combien font 6 multiplié par 3 ?