Publier |
Numériser |
Istitlañ / Sous-titrer Treuzskrivañ / Transcrire OCR du breton / Brezhoneg OCR Dicter un article Tous les outils An holl ostilhoù
S'accréditer | S'abonner | Faire un don
Logo ABP
ABP e brezhoneg | ABP in English |
-
Politique La runification Economie Agro Mer Environnement Vidéos
Culture
Musique Littrature Langue bretonne Histoire Patrimoine
- Communiqué de presse -
Tamm frekañs nevez ebet evit ar brezhoneg e Treger-Goueloù. Ur vezh ruz
Kouezhet eo barnadenn ar CSA evit pezh a sell ouzh ar frekañsoù nevez war ar vandenn FM. Peadra zo da vezañ heuget. En Treger-Goueloù ne vo tamm frekañs nevez ebet evit ur radio brezhonek. Solut e oa teuliad Kaouenn FM koulskoude pa vefe war tachenn ar skoazelloù (dilennidi,
Par Guillaume Morin pour Kaouenn FM le 31/10/06 11:29

Kouezhet eo barnadenn ar CSA evit pezh a sell ouzh ar frekañsoù nevez war ar vandenn FM. Peadra zo da vezañ heuget. En Treger-Goueloù ne vo tamm frekañs nevez ebet evit ur radio brezhonek. Solut e oa teuliad Kaouenn FM koulskoude pa vefe war tachenn ar skoazelloù (dilennidi, kevredigezhioù pe izili hag a c'hallomp trugarekaat holl a greiz-kalon) pe war hini ar budjed, an teknik pe roll ar programoù.

N'eus ket keit-se zo e veze kastizet ha mezhekaet ar vugale er skol pa zeue tammoù gerioù brezhonek e-maez o genoù : embannet e oa sklaer e oa difennet komz brezhoneg. Tostoc'h a-se e seblant bezañ ar c'houlz-se ma 'c'h eo tro ar CSA bremañ hag e skourr rannvroel ar CTR e Roazhon (hemañ diwezhañ bet o studiañ an teuliadoù a-benn kuzuliañ ar CSA e Pariz) da lavaret krak ha berr ec'h eo difennet da dud Treger-Goueloù komz brezhoneg war ar gwagennoù ha ken difennet all klevet o yezh, er vro m'emañ ar muiañ a dud gouest da gompren brezhoneg. Mann ebet e brezhoneg neuze panevet d'an aluzen a ro servij publik France Bleu Breiz Izel dimp gant ar bruzunajoù a abadennoù brezhonek a ya war zisteraat a vloaz da vloaz.

War takad Lannuon ma oa bet Kaouenn FM o kinnig un teuliad e oa dister an niver a frekañsoù kinniget gant ar CSA d'ar re o doa c'hoant da vont war ar renk. N'eus ket plas ken war ar vandenn FM eme e Veurdez ar CSA. Greomp plas neuze : gallout a reer selaou France Inter, France Culture ha France Musique war bep a zaou pe dri frekañs disheñvel. Da biv n'eo ket c'hoarvezet kouezhañ meur a wech war ar memes radio pa oa o klask en un doare otomatek ur radio bennak en e garr ?

Sed aze un toullad sifroù a lakao splann peseurt plas eo hini ar brezhoneg : Gant 14 eurvezh a abadennoù brezhonek war 168 eurvezh a zo en ur sizhunvezh ec'h eo 8,3% feur ar brezhoneg war France Bleu. 0,5 % eo feur ar brezhoneg war hollad ar programoù FM (2856 eurvezh) a c'haller tapout e takad Lannuon . 0% war ar gwagennoù bras, anat eo d'an holl ! Ma vije bet degemeret radio brezhonek Kaouenn FM e vije aet feur ar programoù brezhonek da 5,7% er vro ma vez 42% a dud oc'h embann e komprenont brezhoneg. Un dibab all zo bet avat hag e tiskenno un tamm muioc'h ar sifr-mañ : 0,4%.

Pegeit c'hoazh e ranko Breizhiz degemer e vefe graet fae war o yezh ? Petra a dalvez ar ger « demokratiezh » pa roer gwir d'un dornad tud da zifenn ouzh ur bobl klevet he yezh pa 'z eus 90% anezhi a embann c'hoantaat e vefe miret bev ? Evit doare e ouzer ankouaat, pa vez ezhomm, petra eo ur « Stad a wirioù ». Hag ur wech ouzhpenn, ar pezh a zo aotreet da Gorziz n'eo ket da Vreizhiz a zalc'h da anduriñ abadenn barizian Patrick Sabatier diwar goust an abadennoù lec'hel a vez krennet c'hoazh hag adarre.

An diskoulm zo anavezet : d'ar Rannvro d'ober d'ar CSA mirout ur frekañs evit kement takad na vefe radio brezhonek ebet c'hoazh warnañ, evit ma c'hallo an holl e Breizh dibab etre ar brezhoneg hag ar galleg a-hed an deiz. Kaouenn FM a c'halv an dilennidi da embann en un doare foran o soñj war an diviz mezhus bet tapet gant ar CSA. Gervel a reomp an holl, tud ha kevredigezhioù da zerc'hel d'hon skoazellañ evit ma c'hallo tud ar vro kaout abadennoù e brezhoneg e stumm pe stumm. Er sizhunioù da zont e talc'ho Kaouenn FM hec'h emvod-meur a-benn prientiñ an dazont. An neb a venn hennezh a c'hell. Kaouenn FM 28-10-2006

Voir aussi sur le même sujet :
Cet article a fait l'objet de 1032 lectures.