Stajoù c'hoariva digor d'an holl
Digor d'an holl, komedianed amatour hag a-vicher, d'an dud o deus c'hoant dizoleiñ ar c'hoari pe mont pelloc'h ganti.
Evit an eil bloavezh e kinnig ar c'hevread C'hoariva un heuliad tri staj war ar C'hoariva. Labouret e vo war ar c'han hag ar mod da lâr an traoù e brezhoneg en teatr.
Liammet eo an tri staj an eil re gant ar re-all. Gwelloc'h eo kemer perzh e pep hini anezho met gallout a rit ober ur staj hepken pe zaou.
PROGRAM AR STAJ KENTAÑ
AR C'HAN, Ar c'homedian o kanañ gant Nolwenn Korbell
D'an 12-13 a viz Du - Douarnenez - Ty ar Yaouankiz hag ar Sevenadur
Petra eo kanañ ur ganaouenn war ul leurenn ?
N'eus ket nemet ar vouezh, ar gourlañchenn, ar beg, ar muzelloù, ar penn o labourat, met tout ar c'horf hag ar spered.
Lakaet vo ar pouez war ar mod da "interpretiñ" ur ganaouenn. Labourat warni 'giz ma vefe ur "monologue" kanet 'benn ar fin.
Evit hen ober e vo ret labourat teknikoù ar c'han, gant poelladennoù war an anal, ar son, ar vouezh, an distignañ (relaxation).
Poelledennoù 'vo ivez evit dizoleiñ sonioù disheñvel ar vouezh, evit kanañ just, kanañ a-stroll, improvisañ.
Goulennet vo gant ar stajidi dont gant 2 ganaouenn (ma zo muioc'h, gwel a-se) anavezet dre eñvor ganto.