Gant Kewenn eo bet tapet al label live 1 hiviziken. Divizet he deus raktal ar gumun kas da benn 5 ober ouzhpenn a-benn tapout al label live 2.
Dirak an Ao. Philippe Rondeau, eilmaer, hag izili eus ar C'huzul-kêr, eo bet roet al label Ya d'ar brezhoneg live 1 d'an Ao. Marc Cozilis, maer ar gumun, gant an It. Lena Louarn, prezidantez Ofis ar Brezhoneg, d'an 10 a viz Kerzu 2008. Sinet eo bet ar garta war un dro, a-benn kenderc'hel da vont war-raok ha klask tapout al label live 2 gant 5 ober nevez da gas da benn.
Sed amañ ar 5 ober kentañ bet kaset da benn c'hoazh : divyezhek eo ar panelloù da vont e-barzh hag e-maez ar gumun ; ur panellerezh divyezhek a gaver war douar ar gumun ; krouet ez eus bet un hentad divyezhek gant skoazell servijoù an ti-kêr (distro-skol 2006) ; kement panell nevesaet pe staliet a-nevez zo divyezhek dre ret ; abadennoù brezhonek a vez aozet bep bloaz gant kreizenn sevenadurel ar gumun.
5 ober zo bremañ war ar stern hag a vo da gas da benn vat dindan 2 vloaz. Divyezhek e ranko bezañ : kartennoù-pediñ an ti-kêr evit an abadennoù sevenadurel kinniget gantañ ; responterez an ti-kêr ; panellerezh diabarzh ha diavaez savadurioù an ti-kêr. Kemer a raio perzh an ti-kêr er vrudadeg evit kelenn brezhoneg d'an dud deuet. Ha kelaouet e vo an dud nevez e c'hellont eureudiñ e brezhoneg. Kewenn eo ar 7vet kumun e bro an Oriant o vont gant an argerzh kalite Ya d'ar brezhoneg.