Alies eo bet Roazhon er penn a-raok evit ar pezh a sell ouzh ar brezhoneg ha kendelc'her a ra ar wezh-mañ c'hoazh : sinet eo bet ar garta Ya d'ar brezhoneg gant skol-veur Roazhon 2 d'ar Gwener 28 a viz Du.
Dirak M. Gontard, prezidant Roazhon 2 ha kuzul-merañ ar skol-veur, L. Louarn, prezidantez an Ofis ha Per denez, bet rener rann ar c'heltieg e-pad 20 vloaz, eo deuet Roazhon da vezañ skol-veur gentañ Breizh o vont gant an hent-se.
Kozh eo an istor etre ar brezhoneg ha skol-veur Roazhon bremañ. Kelennet e vez brezhoneg abaoe 1880. Klok eo kursus ar studioù brezhoneg ha deuet eo ar brezhoneg da vezañ an trede yezh studiet ar muiañ a-raok an italianeg, ar sinaeg hag an alamaneg.
Niverus eo an dud a laka ar yezh da vevañ e Roazhon 2, kelennerien ar gevrenn geltiek da gentañ-penn. Pouezus-meurbet eo roll ar skol-veur evit kelenn ar brezhoneg d'an dud yaouank, stummañ brezhonegerien ampart nevez hag ivez skolaerien ha kelennerien zo ezhomm bras anezho evit kenderc'hel da ziorren an hentadoù divyezhek. Un dachenn all zo da vezañ boulc'het, hini ar stummadurioù e brezhoneg a-benn kinnig d'an dud yaouank a zeu er-maez eus an hentadoù divyezhek an tu da genderc'hel gant o stummadur en ur virout ar brezhoneg evel yezh kelenn.
Oberoù liesseurt a zo bet kaset da benn dija gant ar skol-veur (panellerezh, kartennoù-bizit, deiziataer...). Sinañ Ya d'ar brezhoneg a roio an tu da vont pelloc'h c'hoazh ha pouezus eo rak ur yezh vev a rank bezañ gwelet en hec'h endro.