Ploveilh en em laka e-barzh ar jeu evit tapout label 2 ar garta Ya d'ar brezhoneg

Sinet eo bet ar garta gant kumun Ploveilh a-benn kas da benn 11 ober dindan 3 bloaz. Degemeret eo bet an It. Lena Louarn, prezidantez an Ofis, gant an Ao. Franck Pichon, ar maer, hag an Ao. Jean-Pierre Bière, eilmaer,

Sinet eo bet ar garta gant kumun Ploveilh a-benn kas da benn 11 ober dindan 3 bloaz.

Degemeret eo bet an It. Lena Louarn, prezidantez an Ofis, gant an Ao. Franck Pichon, ar maer, hag an Ao. Jean-Pierre Bière, eilmaer, d'ar Yaou 11 a viz Kerzu 2008 evit sinañ ar garta Ya d'ar brezhoneg.

Evit kregiñ gant he frezegenn divyezhek, Lena Louarn he deus trugarekaet an Ao. Roparzh Omnes, bet maer ar gumun e-pad 30 vloaz, peogwir en doa graet kalz traoù evit ar brezhoneg a-hed e respetadoù. Ploveilh zo unan eus ar c'humunioù kentañ o doa staliet plakennoù-straed divyezhek hag o doa lakaet ar brezhoneg da vevañ e buhez ar gumun.

Dibabet eo bet gant ar C'huzul-kêr ober strivoù a-benn lakaat ar brezhoneg war wel ar muiañ ar gwellañ (war ar paper-lizher, kartennoù-bizit an dilennidi, kartennoù-pediñ, kenderc'hel da staliañ plakennoù straed divyezhek, sevel panelloù titouriñ en 2 yezh war glad ar gumun). Kemeret e vo perzh gant ar gumun ivez er vrudadeg evit ar c'helenn brezhoneg d'an dud deuet aozet gant an Ofis bep bloaz. Dibabet en deus ar C'huzul-kêr ivez kelaouiñ kenwerzhourien, embregerezhioù ha kevredigezhioù ar gumun diwar-benn an eil emglev Ya d'ar brezhoneg, an hini savet espres-kaer evit ar gennad prevez.