Plouha a sin ar garta Ya d'ar brezhoneg

Plouha eo ar gumun gentañ e Kumuniezh kumunioù Lanollon-Plouha o kemer perzh ez-ofisiel e diorren padus ar brezhoneg. D'ar Sadorn 31 a viz Genver 2009 e oa bet graet al lid-sinañ. Degemeret eo bet an It. Lena Louran, prezidantez Ofis ar Brezhoneg, gant an Ao. Philippe Delsol, maer ha besprezidant Kuzul-departamant Aodoù-an-Arvor, dirak ur c'hant bennak a dud.

Plouha eo ar gumun gentañ e Kumuniezh kumunioù Lanollon-Plouha o kemer perzh ez-ofisiel e diorren padus ar brezhoneg.

D'ar Sadorn 31 a viz Genver 2009 e oa bet graet al lid-sinañ. Degemeret eo bet an It. Lena Louran, prezidantez Ofis ar Brezhoneg, gant an Ao. Philippe Delsol, maer ha besprezidant Kuzul-departamant Aodoù-an-Arvor, dirak ur c'hant bennak a dud.

Muioc'h-mui e seblant bro Oueloù bezañ dedennet gant ar garta Ya d'ar brezhoneg, rak goude kumunioù Pempoull, Ploueg-ar-Mor ha Porzhig ez eo Plouha a gemer penn an hent bremañ hag a zibab live 1 ar garta.

Un diviz youlek he deus kemeret kumun Plouha eta o tibab 13 ober da gas da benn dindan vloaz en ur bouezañ war an oberoù a lakaio ar brezhoneg war wel war skoroù kehentiñ an ti-kêr : kartennoù-bizit, pedadennoù a bep seurt, paper-lizher, pennad-stur kazetenn an ti-kêr, responterez, kirri ar servijoù kêr.

Brudet e vo glad ar gumun ivez dre staliañ panelloù divyezhek.

Divizet he deus ar gumun mod-all da harpañ diorren an deskiñ brezhoneg gant an oadourien dre gemer perzh e brudadeg vloaziek ar c'helenn brezhoneg.

Displeget en deus an Ao Delsol en e brezegenn e felle da skipailh an ti-kêr krouiñ ur c'hlas divyezhek a-benn 2010. A-benn nebeut ivez e vo graet un enklask e-touez kerent ar vugale da c'houzout pegen dedennet int gant ar c'helenn divyezhek.