Pleskob : ur spered penn a-raok

D'ar Merc'her 28 a viz Genver 2009 e oa bet sinet ar garta Ya d'ar brezhoneg gant an It. Fruchard, maerez Pleskob, dirak an It. Lean Louarn, prezidantez Ofis ar Brezhoneg, a-benn tizhout al label live 2. E miz Mae 2006 e oa bet roet label live 1 ar garta da gumun Pleskob c'hoazh.

D'ar Merc'her 28 a viz Genver 2009 e oa bet sinet ar garta Ya d'ar brezhoneg gant an It. Fruchard, maerez Pleskob, dirak an It. Lean Louarn, prezidantez Ofis ar Brezhoneg, a-benn tizhout al label live 2.

E miz Mae 2006 e oa bet roet label live 1 ar garta da gumun Pleskob c'hoazh. Da-geñver lid-digeriñ mediaoueg ar gumun eo bet sinet gant Nelly Fruchard un eil kevrat evit kas 15 ober dindan vloaz.

Kemer amzer da vuzuliañ al labour da gas war-raok, prientiñ pep tra gant aket, staliañ an traoù evit an amzer da zont, sed aze an doare labourat zo gant Nelly Fruchard hag he skipailh. Startijenn e-leizh a zo gant Pleskob ha gellout a rafe reiñ kentelioù da veur a hini evit a sell ouzh diorren ar brezhoneg er vuhez foran.

An holl oberoù a oa bet divizet kas da benn evit kaout al label live 1 a oa bet graet e koulz hag e kentel. Goude un nebeud mizioù preder evit dielfennañ penaos dont a-benn en deus divizet ar C'huzul-kêr sinañ evit 15 ober nevez da seveniñ dindan vloaz.

Ul lodenn a zo graet pe dost : embann ur pennad-stur divyezhek e pep niverenn eus kazetenn ar gumun pe staliañ panelloù divyezhek e diabarzh hag e diavaez savadurioù an ti-kêr. Panellerezh ar vediaoueg nevez a vo en div yezh da skouer hag ur skoaziad arc'hant a vo roet evit prenañ levrioù e brezhoneg ingal.

Ur sizhunvezh dudi e brezhoneg a vo aozet evit bugale ar gumun ha graet e vo un enklask war soñj an dud da c'houzout pegen dedennet int gant ar skoliañ bugale en div yezh. Mod-all emañ an ti-kêr e darempred gant ar gevredigezh Divskouarn, a labour evit kas war-raok ar brezhoneg e-touez ar vugaligoù a-raok ar skol, a-benn diorren ar brezhoneg gant e erlec'h skoazellerezh-mamm.

Servijoù an ti-kêr a ginnigo teulioù ofisiel divyezhek d'an annezidi evel al levrig-familh, an embannoù ha kement 'zo. E blas a vo roet d'ar brezhoneg bep tro ma vo lidoù ofisiel en ti-kêr, ar pezh a zo bet kroget brav gant an It. Fruchard en he frezennn divyezhek.