Le samadi 2 dou mei d'otobe tertout davant nos mereries pour recllamae Dou galo su les paniaos !

Aloure qé le galo ét yene des deûz langues de Bertaigne o le berzonèqe, q'ol a taet erconû de meme o la consorté de la contré, q'ol ét enségné ès garçailles dens de pu en pu d'ecoles, q'ol ét aprinze o dou monde d'aïje dens ene formézon-de-métië, nan n'la véï ecrite, pour dire, anandret. Ao jou d'anet gn'a 4 parouésse de Bertaigne q'on piqhae des paniaos en galo: Parczae, Loudia, Nouya e Renn o des paniaos dens ene estézon dou metro. Deude 'la gn'a core, de gro, 1.000 aotrs parouésses en Haote-Bertaigne eyou qé gn'a pa aoqhun paniao en galo.

Gn'a pa jameins z'eû d'agheroué pour le galo diq'astoure, ba dame o la nouvielle consorté qi mene la contré depés un mei de temp, farae vantié decéssae de mussae pari ? Vennla de cai qé je perpozon nous autr les l'Andon dou galo e qheuqes aotrs d'o nous q'il on mein dens lou idé de metr subout ene souéte : Dou galo su les paniaos !

Le 2 dou mei d'otobe, la souéteDou galo su les paniaos ! peri tous les bertons, tout sou ou ben cante toute la geroué, a v'ni ao pieu de sa mererie piqhae sinboliqement un paniao de son feuzi o le nom de sa parouésse en galo edssu.

Fara point se metr en peine o la meniere d'ecrire dam, chaq ecrira a son bada ! A chaq fai qé gn'a dou hign-hagn entr nous raport a l'ecritûre ninporca, ét le galo q'i dansi la malézé. Dou cou-la gn'ara point a greussi de la téîte, Chaq ecrira le non de sa parouesse a son bada, v'éz ben oui ? Su l'anplla (voir le site) , gn'ara la rolé des parouésses de Haote-Bertaigne en galo, meins 'la s'ra pour idae le monde e pa ren d'aotr.

Si qé la sonjé-la vouz mene, v'nez don nouz fere ene bouté pa, i n-n'a de l'ouvraïje a m'nae e tant q'assë ! Je s'ron beneize de vous vaïr a sieude la pouche-la: yelle ao galo e ren qé yelle ao galo.

Si qé v'ete ene beroué ou ben tout sou, si qé votr paniao ét afézonae ben afézonae ou ben amarae edssu o les coutiaos en sis-catr-deû, gn'a point choué, le 02 dou mei d'otobe fara point se prometr anlhou, j'on d'yetr Tertout ao pieu de notr mererie pour recllamae a qé le galo s'rae mein en adorçion dens la parouésse, pour recllamae Dou galo su les paniaos !

www.dougalosulespaniaos.com // 06 80 93 02 67 // dougalosulespaniaos [at] voila.fr