Piv a soñjfe dehan, hiriv, e vije saveteet hor yezh hec'h-unan ? Piv, nemet ur gortozer, a soñjfe dehan e vije bet a-drugarez d'e genderv pe d'an amezeg bennak hepken ? Pe, gwashoc'h, d'ur sevenadur all ? Arabat tortal, hon-unan-penn emaomp.
Muioc'h-mui a rederien zo bremañ hag e Breizh muioc'h c'hoazh eget e broioù all. Daoust m'ez eus ur bern redadegoù ne weler ha ne glever ket kalz a vrezhoneg.
An arc'hant zo o kreskiñ er sport-se kentoc'h. Gwellout a reer ar redadegoù brasañ bezañ privatizet, evit ampletiñ : amañ emañ an dalc'h bremañ.
Ober fae ouzh hor yezh, blein eus hor sevenadur, pa vez degemeret kantadoù pe viliadoù a c'halouperien zoken er vro ? Gant ar vezh ! Ur gartenn vat da c'hoari eo koulskoude, hep mar na marteze.
Evel m'e vefe hor yezh an draig dister, ober a reomp pri eus hor pinvidigezh. Den ne afe mont da zistrujañ nag ar chapelioù nag an izilioù abalamour m'ez eus nebeutoc'h a dud enno, neketa ?
Poent eo mont war-raok ! Se zo kaoz hon eus krouet ar gevredigezh Kenti-Kentañ (hervez al lezenn 1901). War hon teeshirtoù zo bet merket : « Kenti-Kentañ. Galoupat e brezhoneg ». Ne chom nemet lakaat an dosard ha bec'h de'i ! Redadegoù a bep seurt a welo hol livioù.
Penaos ez a ar gevredigezh en-dro ? N'eo ket luziet. Resevet e vo an teeshirt gant an ezel pa vo paeet e skodenn (20¤), ul lodenn a zeuio da Ziwan (5¤). Chom a ra an ezel digabrest en e gorn-bro, gallout a ra galoupat evel e fell dezhañ. Da lâret eo, framm ebet e gwirionez. Ret eo dezhañ doujañ a re all pa vez douget livioù ar gevredigezh gantañ, setu tout.
Digor eo Kenti-Kentañ d'an holl : brezhonegerien pe zeskarded, unyezher pe c'hallaouegerien pe me oar me. A-enep deus ar pezh e vez bevet ganeomp er vuhez foran eo merket er statudoù « ne vo ket disparti eneplezenn nag ivez disparti diwar-benn ar yezhoù etre an izili pe dud all. » Neb en deus divskouarn ra glevo… e brezhoneg, hag en ur c'haloupat, mar plij !
Muioc'h a ditouroù war www.kenti-kentan.bzh ha war Facebook ivez.