Kemennadenn Gouel Ai'ta!
D'ar sadorn 14 a viz ebrel e oa bet dalc'het en Tonkedeg kentañ Gouel Ai'ta!. D'an holl bet eno eo bet un devezh hag un nozvezh kaer ha dedennus a-fet kejañ hag eskemm.
Da gentañ e oa en em gavet diouzh beure izili eus an holl gevrennoù (Bro-Dreger, Kerne-Izel, Roazhon, Naoned) ha danvez kevrennoù (Bro-Gwened) a-benn soñjal en aozadur hag e dazont al luskad.
Goude kreistez e oa bet aozet ur gaozeadenn digor d'an holl gant ar strolladoù estren pedet : Cymdeithas eus Cymru, Hartèra eus Occitania, Angelets de la Terra eus Catalunya. Dirak ouzhpenn 60 den e oa bet pep strollad oc'h en em gontañ hag o tisplegañ stad ar yezh a vez difennet gantañ. Hag un diviz frouezhus da heul diwar-benn an doareoù da difenn hor yezhoù herie an deiz.
Da 6eur oa bet pedet ar gazetennerien d'ur brezegenn-gelaouiñ a-benn diverrañ dezhe eskemmoù an endervezh ha lenn dezhe un "disklêriadur a-gevret" (amañ dindan) kensinet gant hor pevar strollad : Cymdeithas, Angelets de la Terra, Hartèra, Ai'ta!.
Evit achuiñ Gouel Ai'ta! e oa bet dalc'het ar fest-noz vras gant 12 strollad pe koublad, eus Bro-Dreger dreist-holl met ivez eus kornioù all evel Eeun hag ar Groove Boys. Ha plijadur sof-kont e sal ar gouelioù en Tonkedeg betek fin an noz !
Disklêriadur a-gevret
"Ni Kembreiz, Katalaniz, Okitaniz, Bretoned, zo bodet herie en Tonkedeg a-benn eskemm diwar-benn ar skiant prenet ganimp a-fet komzerien yezhoù bihan, met dreist-holl a-fet difennerien ar yezhoù-se. Daoust d'an traoù bezañ liesseurt zo perzhioù boutin d'hor yezhoù : minoraelet int, boutet er-maez ar vuhez foran ha dindan ar saozneg hag ar galleg ma 'h int. O implij sokial zo aet kement war-dreñv ken zo teir anezhe lakaet e-touez ar yezhoù en arvar gant an UNESCO abaoe 2002.
Dimp ha d'an holl dud tomm o c'halon ouzh al liested sevenadurel e ranker dizalbenn ouzh ar blanedenn-se. A-orin politikel eo minoraeladur hor yezhoù, hag o diskar da heul. Bro-Frañs, evel Bro-Saoz betek n'eus ket pell 'zo, n'eo ket bet kat ha n'eo ket kat c'hoazh d'anavezout he liested. Krediñ ha fellout a ra dezhi bezañ unyezhek hag unsevenadurel. N'hallo ket koulskoude chom e-pad pell c'hoazh a-gostez d'al lusk dre ar bed a-bezh evit muioc'h a doujañs ouzh al liested yezhel ha sevenadurel. Ha kennebeut all ober fae ouzh testennoù hag erbedoù an ensavadurioù etrevroadel.
Deskiñ a raer kalzig diwar emdroadur ar sistem politikel e Breizh-Veur. An araokadennoù graet e Bro-Gembre abaoe bloavezhioù evit derc'hel ar c'hembraeg en e sav, evit pezh a sell an deskadurezh, ar mediaoù hag ar vuhez foran, a diskwel disoc'hoù mat e statud dam-ofisiel hag efedusted galloud politikel Bro-Gembre. Se zo kaoz e soñj dimp n'hallo ket yezhoù minoraelet Bro-Frañs sevel o chouk hep un ofisializadur. Gervel a reomp eta danvez prezidant Bro-Frañs da gadarnaat Karta Europa ar yezhoù bihan, ret evit derc'hel bev hor yezhoù."
Cymdeithas yr Iaith (Cymru) Hartèra (Occitania) Angelets de la Terra (Catalunya) Ai'ta! (Breizh)
Partager sur LinkedIn