S'accréditer |
S'abonner |
Se connecter |
Faire un donS'accréditer |
S'abonner |
Se connecter |
Faire un don
D'ar Gwener 8 a viz Mae da zont, da 8 e 30, e vo diskuliet e sonadeg nevez gant bagad Lokoal-Mendon evit ar wech kentañ. Gantañ war al leurenn e vo sonerien ha kanerien en deus bet tro da labourat gante er bloavezhioù diwezhañ.
Enrollet e vo ar sonadeg veur-se dirak an arvesterien e-sell da embann ur bladenn live a-benn an hañv da zont. Dalc'het e vo an arvest-se da-geñver an Trofe Roñsed-Mor a vo aozet eus ar 6 d'an 10 a viz Mae.
Daou vloaz goude bezañ lidet o ugentvet Trofe Roñsed-Mor, setu deuet poent d'ar Roñsed-Mor lidañ daou-ugent vloaz o bagad bet krouet e Lokoal-Mendon er bloaz 1969 gant Alan er Vuhé. Abaoe ur pemzek vloaz bennak en deus bet tro ar strollad-se da gejañ gant a bep seurt arzourien war al leurenn. C'Hoant en deus bet da bediñ un nebeud anezhe da sevel ur sonadeg nevez a-benn lidañ e zeiz-ha-bloaz evel m'eo dleet. Setu ma vo klevet gwerzioù ha tonioù da zañsal a bep seurt e-pad ouzhpenn div eur gant Louise Ebrel, ar gan-ha-diskanerez dihesk he startijenn, hag a lusko ar gavotenn diazezet war talmadennoù kaer Paskal Lamour, da skouer. Pep hini eus ar gouvidi a gavo e blas e-kreiz ar bagad da gas an ugent ton bennak a vo roet da glevet en holl. Tonioù nevez kempennet a vo da selaou, hag ivez ar sonennoù o deus kaset brud ar Roñsed-Mor da redek dre ar vro ha betek pell, adkempennet asambles gant Pat O'May hag e c'hitar-tredan rock, Gilles Servat, Samuel Le Henanff hag ar re all.
E-mesk ar sonerien e vo graet lec'h d'un dornad dañserien ouzhpenn-se. Tro o devo ar re 'zo sot gant sonerezh ar vandennad-se da zizoleiñ ur strollad nevez ivez, SKO!, gant Pascal Lamour,Dédé Le Meut, Louise Ebrel ha taboulinerien ar bagad : sonennoù ha ritmoù diroll ! Bec'h d'an trouz... ha d'ar sonerezh ivez. Gwelloc'h mirout e blas abred rak ne vo lec'h nemet d'ut 700 arvester bennak er sal.
Ur Webnoz ispisial
A-bouez-ruz eo da sonerien Lokoal-Mendon, stank ar vrezhonegerien en o zouez, reiñ he lec'h d'ar yezh bep bloaz. Evit ar vugale da gentañ gant an abadenn-vargodennoù “Mab al Loar” kinniget gant ar Pirate Puppet Cie, d'ar Merc'her 6 a viz Mae goude-merenn (5 €). Ur Webnoz ispisial a vo gouestlet d'ar bagad gant Lionel Buannic d'ar memes deiz : atersadennoù ha divizoù e brezhoneg bepred, evit kontañ istor ar strollad ha lakaat ar gaoz war ar sonerezh a vez savet ha kempennet gant ar bagadoù hiziv-an-deiz, ha gant hini Lokoal peurgetket. Kalz a sonerezh a vo er Webnozse ivez gant Gilles Servat, Pascal Lamour ha SKO!, sonerien daou-ha-daou, Louise Ebrel... Digor d'an holl e vo an abadenn, evit netra, evel da gustum. Un digarez d'en em gavout tost ouzh arzourien a-feson !
Ur roll eus ar bravañ
Hag ivez, e-pad an Trofe, ur sonadeg en iliz Mendon gant Kevrenn an Alre, Nolùen Le Buhé ha Régis Huiban, ar familh Le Meut, Le Meut/Le Blay/Le Henanff, d'ar Yaou 7 a viz Mae da noz (7 €). C'hoarioù hengounel d'ar Sadorn goude merenn tro-dro d'ar sal Emeraude (3 €),digor-kalon sonet d'abardaez-noz gant Ciapolino/Conq, an triad Botuha/Guingo/Quillay, Bagadig Roñsed-Mor (digoust). Fest-noz vras gant Kendirvi, Startijenn, Brou/Hamon/Quimbert, Bagad Sant-Maloù, Moal/Chaplain (7 €). Hag ar c'henstrivadegoù boas d'ar Sul : sonerien daou-ha-daou, bombardoù,pipe-bands, Trofe MacCrimmon (binioù bras e-unan), taboulinerien o-unan (digoust)...
Evit gouzout hiroc'h : (voir le site)
Sonadeg KEJAJ : d'ar Gwener 8 a viz Mae, adalek 8e30, sal Emeraude, Lokoal-Mendon, 14 € ma vez prenet e ziked en a-raok (16 € war al lec'h).
Pass Week-End (sonadeg en iliz, sonadeg ar bagad ha fest-noz) : 25 €.
Tikedoù da brenañ war lec'hienn internet ar bagad, en davarn Dundee e Mendon, e ti-kêr Lokoal-Mendon, hag er stalioù Coop Breizh en Oriant, Breizh ma Bro en Alre, Lenn ha Dilenn e Gwened, pe c'hoazh dre lizher : kas ur chekenn war anv ar bagad (evit KEJAJ : 14 € evit pep tiked) hag e chomlec'h da vBagad Roñsed-Mor, Kerdréan, 56550 Lokoal-Mendon.
Vidéos
Newsletters
Flux RSS - français
ABP sur Facebook
ABP surTwitter
Chaîne Youtube ABP