Put your name here

'Benn miz e vo izili Diwan e Landivizio evit Kendalc'h Diwan : emvodoù a vez e pep bro ha deuet e oa tud burev Diwan Breizh el lise evit displegañ d'ar re yaouank penaos kemer perzh er c'hendalc'h.

Seizh eur hanter noz : e sal Anjela Duval lise Diwan Karaez zo bodet daouzek lisead, dilennidi, tud mennet da lakaat ar brezhoneg da vont war-raok e-barzh hag e diavaez al lise, asambles gant Gilbert Cabon, eus burev Diwan Breizh ha prezidant Kelenn, ha Per Keribin, er burev ivez.

Ouzhpenn ar c'hendalc'h a zo bet meneget : plas ar brezhoneg er gevredigezh, penaos kavout an arc'hant evit sikour ar skolioù nevez, plas ar sonerezh hag ar c'hrouiñ evit dazont ar brezhoneg...

Gallout a ra ar re yaouank kemer perzh ha votiñ pa vezont 16 vloaz da nebeutañ. Gant ar spi e vint niverus e Kendalc'h Diwan d'an 20 ha d'ar 21 a viz Ebrel e Landivizio. Dreist-holl abalamour d'ar plas treutoc'h-treutañ a vez graet d'ar brezhoneg gant ar stad C'hall.