Gouel Broadel ar Brezhoneg: Ur sapre programm!

-- Festivals --

Communiqué de presse de Mignoned ar Brezhoneg
Porte-parole: Morwenna Penhouet

Publié le 1/04/19 21:06 -- mis à jour le 01/04/19 21:06

Ur gwir blijadur eo deomp, aozerien Gouel Broadel ar Brezhoneg, kemenn deoc’h e vo gwelet DENEZ Prigent e-kerzh gouel meur hor yezh. Evit an eilvet GBB “mod nevez” e Langoned e teuio neuze. Dalc’het e vo ar fest dibenn sizhun ar Pentekost, deus ar Gwener 7 a viz Even betek ar Sul 9 a viz Even 2019. A-viskoazh eo bet lakaet war wel gant ar festival an arzourien kar-o-yezh. DENEZ a labour hardi evit ar brezhoneg, un enor eo evidomp kaout anezhañ ganeomp neuze. Un dalvoudegezh vras e ro d’ar festival ivez. Faota deomp lakaat da glevet un arzour gwriziennet mat e sonerezh ar vro, met ivez gouest da vont war zu ar sonerezh a-vremañ. DENEZ zo ur den a stroll an dud tro dro d’e vod da gas ar c’han doare “chamanek”. E abadenn nevez, “Mil Hent”, a vesk tonioù elektronek hag akoustek, e-giz red e grouadennoù arzel abaoe an deroù m’eo brudet. Plijout a raio kement d’ar re yaouank tik gant an elektro, kement ha d’ar re goshoc’h plijet gant ar sonerezh akoustek. Ar from treuzkaset a-dreuz d’e sonerezh ne laosk den diseblant.

Ger ar programatour “Me, pezh a blija din gant sonerezh Denez ez eo pa zeer da riboulat e Brest, Naoned pe Roazhon : achuañ a rez en un “after” bennaket, ha bezañ zo atav deus DENEZ war ar playlistoù ! Ral ‘walc’h an arzourien a gan e brezhoneg zo deuet da benn d’ober o zoull ‘barzh kement endro zo tout. Deuet eo da vout ur gwir arouez pozitivel evit ar vrezhonegerien yaouank.”

Arzourien e-touez ar re wellañ e bed ar sonerezh e Breizh ‘vo aze ivez

Anvioù brudet all zo bet kadarnaet. Savet hon eus ar programm o tibab arzourien hag a gan e brezhoneg, hag a ra traoù evit hor yezh pe tud hag o deus un engouestl politikel e-keñver Breizh pe yezhoù bihan-niver er bed.

KRISMENN da skouer a ginnigo e abadenn ‘N om gustumiñ deus an deñvalijenn” d’ar Gwener 7 a viz Even, berzh ‘noa graet e Trans Musicales 2017 !

Evit al leurenn Kan’Noz d’ar Sadorn 8 a viz Even e vo STARTIJENN, steredennoù ar Fest-Noz ! Strollad engouestlet o tifenn kreñv ar brezhoneg, pouezus e oa o c’haout e kreiz ar gouel ! Ar raktres EBEN gant 3 c’hanerez AN TEIR, ar re o deus savet kanaouenn Ar Redadeg 2018, a ginnigo un abadenn hag a oa bet krouet e-pad Gouelioù Etrekeltiek an Oriant 2018. DOM DUFF, kaner rock eus Langoned, a lido e bladenn nevez d’ar Sadorn 8 da noz ivez.

Trec’hourien an Taolioù-lañs paseet

Pal an taol-lañs eo dizoleiñ strolladoù hag a gan e brezhoneg, poellek eo neuze programmiñ ar re o deus gounezet betek bremañ ! UKAN, ar strollad ‘noa gounezet an Taol-lañs e 2017 a vo war al leurenn gant e son “pop-rock”. LUNCH NOAZH, trec’hourien 2011, a lako an holl da lammat e pep lec’h gant o sonerezh jazz, soul, sonerezh ar bed, d’ar Sadorn 8. An daouad EGIN, trec’hourien 2009, a sono an daou zevezh. TYTO ALBA, kaset gant ar ganerez Loeiza Beauvir he doa bet priz ar brezhoneg en Taol-Lañs 2011 …

Bugale ‘vo ivez war al leurenn ! D’ar Sul 9 e vo 300 anezho, BUGALE KREIZ BREIZH, o kanañ evit plijadur an holl. Da heul e vo ur Fest-Deiz gant meur a soner, deuet da seniñ tonioù broioù Breizh, gant KANT A GAN 2018 en o zouez ; kanaouennoù kanet ha rannet etre an holl e kentelioù pe stalioù kanañ e brezhoneg. Ar wech-mañ e vo lakaet war wel Bro-Leon ha Bro-Wened dreist-holl. PEVARLAMM, strollad a-feson heñchet gant ar soner Konogan An Habask, a liammo en un doare soutil sonerezh Breizh ha sonerezh ar bed. Hag evit klozañ ar gouel : ur Fest-Noz bras gant ar strollad FLEUVES, BEAT BOUET TRIO ha da heul un nozvezh SOUND-SYSTEM.

Digor eo enskrivadurioù An Taol-lañs

Gant an Taol-Lañs e vo kroget ar fest d’ar Gwener 7 a viz Even. Kenderc’hel a ra al leurenn-lañs-mañ da ambrougañ strolladoù sonadeg a-vremañ kanet e brezhoneg. 2 rummad a vo ar wech-mañ : unan a-vicher hag unan amatourien. 2 loread a vo ar wech-mañ neuze. Kit e darempred gant an aozerien evit lakaat hoc’h anv ( contact [at] mignoned.bzh) !

Ekoreizhiad ar brezhoneg bodet e-pad 3 devezh

Bourk Langoned ‘vo treuzfeurmet en un takad-bale e-pad an dibenn-sizhun-se. Ken liesseurt hag ar brezhoneg e vo ar gouel : meur a abadenn en hor yezh, atalieroù pleustrek evel ur masterclass skrivañ e brezhoneg ha kanañ pe yoga… Ur programm evit bugale a vo ivez, en o zouez KANEVEDENN d’ar sadorn 8/06, LONENED FUR HA FOLL d’ar sul 09/06. Digoust e vo ar mont e-barzh evit ar vugale a zo nebeutoc’h eget 12 vloaz. C’hoariva liesyezhek a vo kinniget ivez gant TEATR PIBA (sul 9), un abadenn c’hoariva pobl gant KANFARTED LANLEYA (sadorn 8) hag un dibab eus ar filmoù gwellañ e brezhoneg, istitlet e galleg (7, gant ar sevenerien hag un tabut da heul ar film), ur gêriadenn evit an niverel e brezhoneg, ur gêriadenn gant embannerien ha kevredigezhioù sevenadurel tro dro d’ar brezhoneg, taolioù-krenn ha tabutoù jubennet e galleg war eeun, c’hoarioù e brezhoneg, un “escape game”, ur c’hoari bras gant Sten Charbonneau, sirk, gouren, un tournamant mell-droad tredeoget e brezhoneg, ur gêriadenn gant artizaned, h.a. … Pedet e vo ivez prezidant ar gevredigezh EUSKAL MONETA da zisplegañ deomp penaos e vez graet gant ar moneiz lec’hel Eusko evit diorren implij ar yezh.

Kounadurig istorel

Abaoe ar bloavezhioù 70 ez eus eus “Gouel Broadel ar Brezhoneg” ; douget gant frammoù a bep seurt, kevredigezhioù pe strolladoù politikel, GBB ‘neus bodet betek 10 000 den da skouer e Spezed e fin ar bloavezhioù 90. Un oadvezh all a zo gant ar stumm nevez e Langoned : douget ‘vez gant ar gevredigezh Mignoned ar brezhoneg evit an eil gwech ha kreizennet eo bremañ e Bro ar Roue Morvan, Kreiz-Kornog Breizh, e Langoned neuze. Ar gouel ‘neus c’hoazh ul liv a stourm gant arc’hadur kreñv ofisieladur ar brezhoneg ; e rekipe : bodañ bed ar brezhoneg e memes lec’h e-pad 3 devezh, “Planedenn hor yezh”. Kenaozet ‘vez ar gouel gant Mignoned ar Brezhoneg ha Bod Kelenn, ur gevredigezh eus Langoned.

Prenañ bilhiji evit Gouel Broadel ar Brezhoneg:

C’hoant ho peus da vezañ ‘barzh ar jeu ? Kit e darempred gant Mignoned ar Brezhoneg evit bezañ a-youl vat !

Evit muioc’h a ditouroù, mont e darempred gant an aozerien : Kevredigezh Mignoned ar brezhoneg / contact(at)mignoned.bzh / 06.11.70.65.92 / www.gbb.bzh

Voir aussi :
mailbox imprimer