Sinet eo bet an emglev Ya d'ar brezhoneg gant an Ao. Jean-Paul Cluzel, prezidant-pennrener Radio France hag an Ao. Emmanuel Yvon, rener France Bleu Breizh-Izel d'al Lun 6 a viz Here 2008. Kas 23 ober evit diorren ar brezhoneg da benn eo ar pal. Displeget mat eo bet gant Emmanuel Yvon en e brezegenn zivyezhek.
Al lid a zo bet dalc'het dirak an It. Lena Louarn, prezidantez Ofis ar Brezhoneg, an Ao. Pierre Maille, prezidant Kuzul-departamant Penn-ar-Bed, an Ao. Andrev ar Gag, dileuriad Penn-ar-Bed evit ar yezh an Ao. Thomin, e karg eus ar politikerezh yezh er C'huzul-rannvro, an Ao. Jean-Jacques Urvoas, kannad Penn-ar-Bed, an Ao. Bernard Poignant, maer Kemper, hag an It. Naig Gars, kuzulierez-rannvro. Bernard Liot, rener France Bleu Loire Océan ha Serge Landureau, rener France Bleu Armorique a oa war al lec'h ivez.
N'eus ket bet gortozet gant an Ao. Emmanuel Yvon hag e skipailh e vefe bet sinet an emglev evit lakaat an traoù e pleustr dre m'eo bet kinniget teul steuñvenn programmoù ar bloaz-mañ en div yezh c'hoazh. Ouzhpenn-se ez eo bet skoazellet koulzad brudañ ar c'helenn d'an dud deuet gant ar skingomz o skignañ bommoù bruderezh da eurioù reoliek. Ar wezh kentañ eo e veze graet seurt tra e Breizh.
Tri ael labour a zo war ar stern hiviziken. Implijet e vo ar brezhoneg e binvioù labour France Bleu Breizh-Izel : paper-lizher, responterez, kartennoù-bizit ha kement 'zo ha savet e vo un enklask e-touez implijidi ar skingomz a-benn gouzout piv a oar brezhoneg. Kinniget e vo heuliañ ur stummadur da zeskiñ pe da beurzeskiñ brezhoneg d'ar re a fell dezho.
Klasket e vo ivez diskouez ar brezhoneg d'an holl ar muiañ ar gwellañ. E brezhoneg e vo lakaet al lec'hienn Genrouedad koulz hag an teulioù brudañ (teulioù kazetennerien, teulioù kinnig…). Evit kirri ar framm e vo graet ar memes tra. Pennad-stur ha pennadoù zo en embannadurioù a vo e brezhoneg. Kemmet e vo ar panellerezh diavaez ha diabarzh tamm-ha-tamm. En div yezh e vo kinniget ar pedadennoù d'an darvoudoù aozet gant ar savlec'h. Degemeret e brezhoneg e c'hallo bezañ nep piv bennak a yelo e darempred gant ar radio.
Divizet en deus France Bleu Breizh-Izel implijout ar brezhoneg en e abadennoù hag en e gelaouadennoù. Kelaouiñ reoliek diwar-benn an oberoù kaset da benn evit ar brezhoneg hag an divyezhegezh a glasko ober ivez. Brudañ ar garta Ya d'ar brezhoneg ha kemer perzh er c'houlzad brudañ evit ar c'hentelioù brezhonek d'an oadourien a zo bet lakaet da bal peurgetket.
Dre ar sinadur-mañ e tiskouez France Bleu Breizh-Izel e c'hoant da vezañ ur gwir servij publik lec'hel o vont war-du an divyezhegezh.