Ur pemzek gwazour tiriadel bennak o doa kemeret perzh d'ar Yaou 26 ha d'ar Gwener 27 a viz Here 2007 er staj kinniget gant KBMFT Gwened ( Kreizenn Vroadel ar Velestradurezh Foran Tiriadel ) : « Merañ an divyezhegezh da live un tiriad » a oa an danvez anezhañ.
Ur framm da stummañ implijidi an strollegezhioù lec'hel eo ar c'hKBMFT hag e geveler reoliek eo deuet an Ofis da vezañ hiziviken.
Daouhanteret eo bet ar staj-mañ. Gouestlet e oa bet an devezh kentañ da zielfennadur stad an traoù evit a sell ouzh an divyezhegezh en Europa dre gemer skouerioù resis (Kalz mennozhioù talvoudus zo da gemer e Kembre da skouer). Kinniget ez eus bet war-lerc'h pleustriñ war al labour da skoueriekaat an anvioù-lec'h, prederiañ war palioù al labour-mañ ha penaos e dalvoudekaat. Evit echuiñ eo bet displeget d'ar stajidi ar pezh a c'helle ober ar strollegezhioù lec'hel hervez o ment ha penaos diorren an divyezhegezh.
E-pad an eil devezh ez eus bet klasket gant tud e karg an Ofis reiñ respontoù fetis da implijidi ar strollegezhioù. Dre m'emañ an dud-se o labourat er c'humunioù hag en departamantoù o deus ezhomm modoù implij resis ha doareoù d'ober gwiriekaet a-benn aozañ ha kas da benn vat an divyezhegezh war o zachenn. Abalamour d'ar c'houlzad « Ya d'ar brezhoneg er c'humunioù » (64 c'humun o deus sinet en deiz a hiziv) ez eus bet savet meur a ober pleustrek aes da gas da benn gant an holl (panellerezh, plakennoù straed, talvoudekaat ar glad dre banelloù divyezhek…) hag e c'heller bremañ diskouez skouerioù fetis hag a ro respontoù sklaer d'ar gargidi lec'hel.
Ar stajidi deuet eus ar 5 departamant a Vreizh, mui unan anezho a oa deuet eus Kuzul-departamant ar Pireneoù-Atlantel zoken, o deus lavaret sklaer e oant bet plijet-bras gant ar staj-mañ dre ma oa danvezioù pragmatek ha kinniget en un doare micherel-kenañ.
