Diwan : sinadur ar Gevrat Kenrouedad e pep bro, a-raok an Emvod Meur e Plañvour

Kenderc'hel a ra Diwan gant e hent. Muioc'h-mui a skolidi, a skolioù, a skolajoù. Hag evit efedusaat labour ar re a-youl-vat eo bet sinet ar Gevrat Kenrouedad gant pep bro.

25 skol, 6 skolaj, ul lise, 350 skolaer ha kelenner, 150 implijiad nann-gelennerien, 3200 bugel : piv en dije lavaret, 33 bloaz 'zo, e vefe deuet Diwan da vezañ ur gwir embregerezh ?

Gant ur greizenn stummañ e Kemper (Kelenn), gant gouelioù un tammig e pep lec'h (Tro Menez Are, foarioù bio, Randorade, Taol Kurun, Tro Heol, ar Redadeg ...) diaes eo priziañ pouez Diwan e buhez sevenadurel ar vro.

Met, evel en holl gevredigezhioù eo diaes kavout tud a -youl-vat. Seblantout a ra da familhoù'zo emañ pell Diwan Breizh diouzh ar skolioù, diaes eo rastellañ arc'hant, diaes eo kaout bugale pell diouzh ar gêr, emvodoù hir, labour e-pad an dibenn-sizhun...

Setu perak eo diaes da Guzul merañ Diwan merañ an holl skolioù, ken sammet e izili gant al labour. Daoust d'al labour divent a vez graet gant ar renerez hag he skipailh, e vez labour pounner evit an holl re a-youl-vat. Emvodoù gant Skype, devezhioù hir e Karaez gant tud o tont eus Naoned, Brest, Sant-Brieg ...

Abaoe daou vloaz eo bet lakaet ar gomz war un aozadur disheñvel, evit ma c'hellfe ar re a ro arc'hant da Ziwan, hag ar re a zo er c'huzulioù skoazell pe er c'hevredigezhioù a souten Diwan (dastumet e vez 300 000 euro pep bloaz gant re a-youl-vat ) kemer muioc'h a berzh e buhez Diwan, dre vroioù.

E Kemper, Lannuon, ar Releg, Gwened, Naoned o deus ar c'hevredigezhioù (AEP, Kuzulioù skoazell, kevredigezhioù all) sinet ur gevrat evit embann emaint a-du da genlabourat hag ober ur gwir genrouedad vro. E Bro Gwened hag e Bro Lon e vez graet al labour-mañ dija, met e Bro Gerne hag e lec'h all e vo un dra nevez.

Sikourioù kumunioù, kuzulioù-meur... a vo war an digresk, setu perak eo a-bouez ma vefe tud Diwan o labourat hardi a-benn rastellañ arc'hant. N'eo ket gant ar 7 500 euro roet gant Il-ha-Gwilen e vo bev Diwan warc'hoazh ! 700 000 euro departamant Penn-ar-Bed a zo un dra gaer, met n'eo ket sur e pado pell kennebeut.

En arvar e vo Diwan ma vo ar bloavezh 2011 heñvel ouzh hini 2010 (100 000 euro divigad war ur budjet 3,6 milion). Koulskoude e kendalc'h Diwan da greskiñ : 9 skol kroueet dindan 6 bloavezh, roet e vez postoù gant ar rektordi evit ar poent.

Ha kresk al lise, ar skolajoù hag ar skolioù a ro nerzh d'an holl, daoust d'an diaesterioù. Gant ma vo pep ezel eus Diwan o kemer e lod, evit ma kresko bugaligoù Breizh e brezhoneg, a-hed an deiz !