Distro-skol ar re vras : da heul ar skolidi eo ar mare evit an dud deuet da zont da zeskiñ brezhoneg

C'Hoant ho peus da zeskiñ brezhoneg ? Gant 200 lec'hiad deskiñ kentelioù noz d'an distro-skol-mañ e Breizh e kavoc'h un doare evit deskiñ brezhoneg nepell diouzh ho ti a-dra-sur. Stank eo rouedad ar c'helenn d'an dud deuet er bloaz-mañ c'hoazh

C'Hoant ho peus da zeskiñ brezhoneg ? Gant 200 lec'hiad deskiñ kentelioù noz d'an distro-skol-mañ e Breizh e kavoc'h un doare evit deskiñ brezhoneg nepell diouzh ho ti a-dra-sur.

Stank eo rouedad ar c'helenn d'an dud deuet er bloaz-mañ c'hoazh : 200 lec'hiad a ginnig kentelioù noz e Breizh, aozet gant 160 framm e 174 kumun.

Gallet hon eus klokaat ha neveziñ roll ar frammoù a ginnig kentelioù a-drugarez tud a vicher bed ar c'helenn, an dud a youl vat niverus ha dre foromoù ar c'hevredigezhioù zo bet dalc'het un tamm e pep lec'h e Breizh.

Kentelioù nevez zo bet savet er bloaz-mañ evit kinnig deskiñ ar yezh e lec'hioù ma ne oa netra betek-henn. Gallout a reer menegiñ ar gevredigezh nevez krouet « An Holl d'ar skol » hag a zo o vont da ginnig kentelioù e Pempont pe ar c'helc'h keltiek e Mur pe c'hoazh Kuzul skoazell Diwan Savenneg nevez krouet el Liger-Atlantel.

Meur a zoare zo evit deskiñ brezhoneg : gallout a rit dibab stajoù berr pe hir hag a gloto gant hoc'h ezhommoù micherel da skouer.

Kavout a reoc'h holl daveennoù ar frammoù a ginnig stummadurioù dibaouez pe stajoù er roll enlinenn. N'hon eus ket disoñjet ar re n'emaint ket o chom e Breizh evel-just ! Gallout a raio ar re zo e Bro-C'hall pe er broioù all zoken deskiñ brezhoneg : 30 kevredigezh a ginnig kentelioù noz e-maez Breizh ha 17 skol-veur hon eus renablet er bed evit ar mare hep menegiñ ar c'hentelioù dre lizher.

Neuze na chomit ket etre daou soñj : kit da deurel ur sell ouzh ar roll enlinenn nevesaet ingal a-benn kavout ar c'hentelioù a gloto gant ho c'hoantoù gant an titouroù dre ar munud.

Gallout a rit dont e darempred ganeomp evit bezañ heñchet war-du ar c'hentelioù tostañ eus ho lec'h annez gant an niverenn 0820 20 23 20 pe dre bostel studi.diorren(AT)ofis-bzh.org