P'emañ gouelioù dibenn ar bloaz o tostaat, e kinnig an Ofis deoc'h ur porched 700 c'hoari liesseurt hag ur c'hoari strategiezh anvet « Freecol » lakaet e brezhoneg evit implijerien ar Genrouedad.
Bastañ da ezhommoù ar gevredigezh evit a sell ouzh teknologiezh ar c'helaouiñ hag ar c'hehentiñ zo unan eus palioù pennañ an Ofis. Se zo kaoz e laka kalz a nerzh labour da dreiñ e brezhoneg lec'hiennioù kenrouedad, meziantoù ha c'hoarioù video diseurt. Emañ o paouez echuiñ treiñ ur porched c'hoarioù anvet e galleg « Jouer sans arrêt » (pe e katalaneg « Megajocs » ) a gaver ennañ 700 c'hoari a bep seurt da vastañ da c'hoantoù an holl. (strategiezh, redadegoù, fardañ, sonerezh, miltamm, sportoù ha kement'zo) « Melldudi » eo anvet ar porched-se ha kavet e vez e katalaneg, okitaneg, italianeg, galizeg, saozneg ha me oar. Sed amañ al liamm : (voir le site)
Gant skoazell Kevin Laquaine-Jakez, zo studier war an ekonomiezh ha bet skoliataet e Diwan a-hed e amzer-skol, eo bet lakaet e brezhoneg Freecol, ur stumm azaset evit bed ar meziantoù dieub eus ar c'hoari hollvrudet « Colonization – Civilisation » a gas ar c'hoarier da vare aloubidigezh Amerika er XVvet kantved. Unan eus an 40 yezh implijet evit ar c'hoari digoust-se eo ar brezhoneg. Un endro e brezhoneg penn-da-benn a vez kinniget daYann vrezhoneger evit c'hoariadennoù hir, e-unan pe gant tud all. Evit pellgargañ ar c'hoari : (voir le site)
Partager sur LinkedIn