S'accréditer |
S'abonner |
Se connecter |
Faire un donS'accréditer |
S'abonner |
Se connecter |
Faire un don
“BEV EO AR BREZHONEG, HA STOURM A RIMP EVIT MA CHOMO GWIR !”
Setu petra a fell da luskad Ai'ta ! degas da soñj da bPierre Maille, diriaou, 17 a viz Genver, da geñver lid ar bloavezh nevez hag a vo dalc'het adalek 6 eur noz e Kuzul-Meur Penn-ar-Bed, e bali Dupleix e Kemper.
D'ar 5 a viz Genver e embanne an aotrou Pierre Maille e soñj diwar-benn ar brezhoneg er c'hazetennoù. Na pebezh dispriz a-berzh prezidant Kuzul Meur Penn-ar-Bed eta, pa renk ar brezhoneg e-touez kinkladurioù ar vro ha netra ken. Un dispriz da geñver an holl dud hag a gomz hor yezh er vuhez pemdez, koulz ha d'an holl re, niverusoc'h c'hoazh, hag a fell dezho e chomfe bev !
Hag ober a ra van deus an niver brasoc'h-brasañ a vugale skoliataet er skolioù divyezhek pe dre soubidigezh, deus o familhoù, deus ar vrezhonegerien yaouank niverusoc'h-niverusañ, deus an dud gour a zesk hor yezh er c'hentelioù-noz hag er stajoù-hir, deus an holl dud a vez o reiñ deus o amzer evit ma vo un dazont d'hor yezh, deus aozadurioù ar bed sevenadurel, ar bed ekonomikel, ar bed kevredigezhel pe c'hoazh ar strollegezhioù hag a ra kemend-all ? Ha disoñjet en defe ivez an 12 000 a dud bet o vanifestiñ e straedoù Kemper d'ar 31añ a viz Meurzh diwezhañ evit goulenn groñs ma vo doujet ouzh hor yezh evel m'eo dleet hag evit ma vo roet deomp peadra da reiñ dazont un dazont dezhi ?
Ne c'heller ket degemer tamm ebet e gomzoù dismegañsus evit an holl re a fell dezho e chomfe bev ar brezhoneg ! Gantañ e vez lavaret ar c'hontrol-mik deus ar pezh hon eus-ni ezhomm, dre m'hon eus gwir da vevañ en hor yezh, evel ma ra ar Gatalaniz hag ar Gembreiz !
Daoust da gomzoù an Ao. Maille, lakaat ar brezhoneg da vont war-raok n'eo ket un afer arc'hant hepken. Ma vefe implijet ar brezhoneg en holl labourioù (lizhiri, kehentiñ...) kaset da benn gant Kuzul Meur Penn-ar-Bed e vefe brudet hor yezh dibaouez ha marc'had-mat e vefe. Evit kement-mañ avat e ranker kaout ur gwir youl bolitikel... moarvat e c'houlennomp re ouzh an Ao. Maille. Ha pa vez dilennidi Katalonia ha Kembre o labourat start evit o yezhoù, prezidant Kuzul Meur Penn-ar-Bed ne ra foutre-kaer… “Ar Vretoned ne dalvezont ket kement a boan, sur !”
Komzoù ken dichek a-berzh un dilennad e Breizh a heug ac'hanomp ! Goulenn a reomp groñs ma vo lakaet e plas gant an holl strollegezhioù lec'hel, ha dreist-holl gant Kuzul Meur Penn-ar-Bed, ur gwir bolitikerezh war ar yezh, youlek ha gant startijenn, evit reiñ un dazont d'hor yezh da vat ha da viken. Goulenn a reomp ivez ma vo kadarnaet buan Karta Europa evit ar yezhoù minorel, evel bet prometet gant François Hollande.
N'omp ket bleup memestra ha gouzout a ouzomp n'eo nemet dre ar stourm e vez gounezet traoù evit ar brezhoneg ! Pediñ a reomp eta an holl dud hag a vez prederiet gant dazont ar brezhoneg da sevel o mouezh evit bezañ klevet, ha kerkent ha diriaou, adalek 5 eur 30 d'abardaez dirak Kuzul-Meur Penn-ar-Bed e Kemper. Degasomp soñj da bPierre Maille eo didalvoud distripañ « Bloavezh mat » ur wech ar bloaz e miz Genver ma 'z eo evit chom hep ober mann ebet da c'houde evit hor yezh !
Vidéos
Newsletters
Flux RSS - français
ABP sur Facebook
ABP surTwitter
Chaîne Youtube ABP
ABP sur Google