Embann a ra servij an Arsellva bilañs bloaziek ar c'helenn d'an oadourien : 4 880 den deuet o deus heuliet kentelioù brezhoneg e-kerzh ar bloavezh 2008, da lavaret eo +6 % e-keñver 2007.
Mat-kenañ eo kresk an distro-skol-mañ evit an dud deuet enskrivet er c'hentelioù noz : +9,8 % e live an deraouidi ha +6 % en holl liveoù mesket. Eilpennet eo bet emdroadur ar sifroù e-keñver tuadur ar bloavezhioù tremenet. Kresket eo an niver a zeskidi evit ar wezh kentañ goude 10 vloaz digresk da-heul.
E takadoù pobletañ Breizh e kaver ar muiañ a dud deuet a zesk brezhoneg : Roazhon a chom ar gumun ma kaver ar muiañ a oadourien o teskiñ brezhoneg er c'hentelioù noz ha Naoned an eil.
E bro Gerne eo aet an niver a zeskidi ar muiañ war greskiñ en distro-skol-mañ : +37 %. Daougementet eo bet an niver a zeraouidi er vro-se e-keñver distro-skol 2007 a-drugarez al lec'hioù nevez digoret er vro gant Mervent da skouer. Lakaat a ra ar bilañs-se war wel efedusted ar frammoù a-vicher a genurzh ur rouedad kentelioù noz. Er broioù m'emaint staliet e kaver ar muiañ a skolidi.
Ur rummad nevez a zeu mat war wel en distro-skol-mañ : ar c'hopridi a heuilh kentelioù sizhuniek war o amzer labour ha war o lec'h labour. Ouzhpenn 200 goprad eo an niver a dud stummet war ar brezhoneg er mod-se.
An holl roadennoù dre ar munud evit ar c'hentelioù noz evit ar stajoù ha dre lizher a vo kavet er bilañs klok ao amañ-kevret.