S'accréditer |
S'abonner |
Se connecter |
Faire un donS'accréditer |
S'abonner |
Se connecter |
Faire un don
Ar bloavezhioù 1980 eo tachenn ar Groove Boys, ha war un ton farsus ouzhpenn ! Kement ha respont da c'houlenn kreñvoc'h-kreñvañ o selaouerien emaint o vont da enrollañ ur bladenn, warni tonioù brudet eus ar bloavezhioù-se sonet gant ar binioù hag ar vombard. Div sonadeg a vo enrollet e live dirak an arvesterien d'an 22 ha 23 a viz Mae, e Gwipavaz hag er Forest-Fouenant.
Ya ! : Degasit 'ta da soñj d'hol lennerien peseurt doare sonerezh a vez aozet ganeoc'h, da gentañ...
Goulc'hen An Ostiz : N'ouzomp ket ha tu zo da gaozeal eus un doare sonerezh resis met dre vras ez eus tu lavarout e sonomp sonerezh anavezet gant an holl kentoc'h, gant bombardoù, biniawioù, benvegoù kouevr ha toumperezh eilet gant son an urzhiataer. E-touez hon tonioù e kaver “Le jerk”, “Gimme, gimme, gimme”, “Maldon”, “Rise up”... Sonerezh a vez klevet er boestoù-noz diouzh ar c'hiz pe “mod kozh”, a-benn ar fin !
Penaos eo bet krouet ho strollad ?
Savet eo bet da vare deiz-ha-ganedigezh ur c'hamalad er strollad. Ne oa ket ur mennozh rakjedet a-ratozh met un taol-esae gant ur groove box kentoc'h (ur benveg gant sonioù elektronek) hag un nebeud tud gant ar binioù hag ar vombard. Tamm-ha-tamm eo kresket ar strollad betek kaout c'hwezek soner war al leurenn d'ar muiañ, hiziv-an-deiz !
Sonerezh ha fent da gentañ neuze...
“Tu vas t' détendre” eo ger-stur ar strollad.Arouezius eo evit diskouez perak n'omp ket gwall-inervet gant ar sonerezh.Ha gwelloc'h c'hoazh, un doare eo da zispakañ hon energiezh da farsal war al leurenn ha da eskemm gant an arvesterien.Evit-se e klaskomp lakaat anezho da gemer perzh : kanañ ganeomp eveljust hag ivez dont war al leurenn pa ne vezomp ket-ni o tiskenn da zañsal gant an dud. Ar fed bezañ treuzwisket a zo fentus ivez dre m'en deus pep hini un dudenn disheñvel.
Un eil pladenn a vo enrollet ganeoc'h a-raok pell. Petra 'vo sonet warni ? Tuboù eus ar bloavezhioù 80 gant ar vombard hag ar binioù bepred ?
Dres ! Enrollet e vo ganeomp un eil pladenn war-eeun e-pad div abadenn (ul “live”) d'ar Gwener 22 a viz Mae en Alizé e Gwipavaz ha d'an 23 en Nautile er Forest-Fouenant. Digoust e vo a-ratozh evit reiñ tro d'ar muiañ a dud dizoleiñ hor sonerezh ha dreist-holl dont da gemer perzh ha d'ober trouz evit an enrolladenn. Seul vuioc'h a dud, seul vuioc'h a drouz ! Ur pemzek bennak a donioù a vo tu klevet, tonioù hag a zo bet sonet ganeomp a-viskoazh hag ivez un nebeud reoù nevez. DJ Wybee a glozo ar sonadeg bep taol.
Enrollet e vo dirak an arvesterien,perak 'ta ?
Dibabet hon eus sevel ar bladenn dirak arvesterien peogwir ez eo an doare gwellañ evidomp da ziskouez hon doare sonerezh. Da gentañ-penn, ne felle ket deomp enrollañ dre ma ne seblante ket deomp e oa hon doare sonerezh unan da vezañ selaouet er gêr... Met muioc'hmui e vez goulennet diganeomp enrollañ pladennoù. Embannet hon eus unan gant pevar zon gant ur bonus video met ne oa ket bet trawalc'h. Goulennet e veze muioc'h c'hoazh ha setu perak hon eus divizet enrollañ un albom. Ur bonus video a vo ar wech-mañ c'hoazh.
Vidéos
Newsletters
Flux RSS - français
ABP sur Facebook
ABP surTwitter
Chaîne Youtube ABP