Emañ ar gevredigezh Poellgor an Tarv e-touez an dek siner kentañ o resev al label Ya d'ar brezhoneg abaoe ma oa bet lañset ar c'houlzad labelaat d'ar 5 a viz Here 2007.

Dalc'het e oa bet lid-roidigezh al label live 1, “Skoazell d'ar brezhoneg”, d'ar gevredigezh Poellgor an Tarv e ti-kêr Gwimaeg d'ar 4 a viz Genver 2008 dirak ar brezidantez Joanna Mackenzie-Farmer hag Armel ar Sec'h, dilennet er c'huzul-merañ, ha maer ar gumun (he doa sinet ar garta Ya d'ar brezhoneg e 2004) an Ao. Bernard Cabon.

Bodet ez eus e Poellgor an Tarv arzourien eus Breizh hag eus lec'h all o deus dibabet liammañ o arz ouzh ar brezhoneg. Sinet e oa bet gantañ an emglev Ya d'ar brezhoneg e 2003 ha n'en deus ket paouezet abaoe da sevel oberoù a-benn implijout ha brudañ ar brezhoneg pa gav tro.

Al label Ya d'ar brezhoneg zo deuet war-lerc'h 9 ober a zo bet kaset da benn vat gant Poellgor an Tav :

Kartennoù-hetoù divyezhek
Pedadennoù divyezhek
Logo divyezhek
Lec'hiennoù kenrouedad, divyezhek evit al lodenn vrasañ anezho : (voir le site) ha (voir le site)
Kemennadennoù divyezhek d'ar gazetennerien
Plaketenn vrudañ divyezhek
Bruderezh divyezhek (skritelloù ha follennoù pleg-dibleg)
Paper lizher divyezhek

Ouzhpenn-se un ober dreistordinal a zo bet savet ivez diwar atiz ar gevredigezh hec'h-unan : saloñs an arzoù divyezhek a vez aozet bep bloaz (abaoe 10 vloaz) hag eno e vez kinniget oberennoù an arzourien e brezhoneg.