L’Andon dou Galo, agherouaéy èz consortriy dou Galo, ét flaé vra flaé o lez diriy a Joseph Orhan, maerr de dvàn de Montnae qh’il ét lu, androe lez paniaù an Berzonèq qhi son pór yett piqhae su l’oraéy galeizz aù departamàn dou Morbihan.
Permiae, n-i a vra o qaï yett horni a oui paraï diriy su l’Istouaérr de la Bertaèyn. Meintiunn faï, lez biniaéy-la on tae cotiy o dez eteüdd istoriq mein aparaessanss qé n-i a terjou dez bacouann a délae pa’là, a yet maù-diassorr androe l’Istouaerr bertonn.
Il ét nett emeyànt de s’avizae qé la filomiy bertonn e lez dmàndaéy qhi on a-rvéïr o la làng galeizz son hardi-preinzz o dez bobiasriy e dez chouann d’mnaéy de mem.
Au parsu, n-i a o qaï huchae can q’c’ét q’ël siun Orhan ét a montae su sa roch a dirr qé la Haùtt-Bertaèyn taet un paeï « exclusivement francophone » ( « caùzou frànsae séman » an galo) d’aùtfaï. Et d’mem qé nan poe s’avizae conbein qé sti-la ét ergardànt su lez berton galo, yaeü-si su qhi q’n’an a sitàn dit depaé dez berouaé d’sieq raporr a qhi préchaen un parlamàn « trivial auquel nous ne sommes pas habitué » e o qhi qé «nous n’arrivons pas à les faire s’expliquer » (orinae d’unn parchaéy a la poliss. Piémae. 1825).
N-i a o qaï s’erimae etou can q’c’ét qe nan s’avizz q’ël siun Orhan a pouein jamein mi ël Galo an adorsion dedàn sa parouaéss aù-cou qh’i tae maerr, qh’i s’a pouein jamein parae d’o nótt làng netou e qh’il a pouein jamein tieindeü d’o yèll diq’astourr alourr qé n-i a deja catt parouaéss su la Bertaèyn q’il on piqhae ou bein amarae dez paniaù an Galo (sàn pouein, pór unn egrenn anmèll yèll terjou, decnaett ël berton). A nótt modd, ël siun Orhan ét un eqheniouz qhi s’éïdd d’o l’debiamm dou galo pór mett dou paï de marcaù antt lez berton e pór anloriétae ël moñn o dez chouann de diriy orinaéy de jacobein.
L'Andon dou Galo tiein o la menn de greyriy de paniaù an Berzonèq su lez rott cóm yèll-si q’i ét mnae astourr-si o l’consey jenera aù Morbihan e je grousson a q’ël Galo arae son pegemenn li etou, pór bein dirr a qé n-i arae d’domé pór ël Galo su tout ël terouaerr a la Haùtt-Bertaèyn (oraéy dou lvàn dez Graéy d’Armor e dou Morbihan ; Ill-e-vilaenn e Leirr-de-Bertaèyn de chaé an chaé).
Ël siun Orhan ét periae a mett a-ba son hardi-pernanss biech e politiq su nótt làng, ël Galo. Edssu o lez coutiaù !
L'Andon dou Galo Agherouaéy èz Consorteriy dou Galo Fédération des Associations de Gallo Perzidant/Président: Michael Genevée Le Piesi/Le Plessix 56140 TERIA/TREAL Tel: 06 84 64 55 84 Email: andon_dou_ galo [at] yahoo.fr
pDiriy aù maerr de dvàn de Montnae
Anrvaéy a l’ANDON DOU GALO