17vet TAOL KURUN : penaos bout en e vleud ?

- Agenda -

Ur festival ganet evit difenn skol vihan bro Kemperle, hag a zo deuet da vezañ, 16 vloaz war lerc'h un emgav reoliek evit 5000 den gant 35 abadenn, 150 arzour, 1500 bugel o kemer perzh, ur bier nevez anvet "Taol Kurun" hag un tem diazezet war ar boued hag ar boeson "Bout en e vleud".

Fanny Chauffin pour ABP le 19/12/10 11:36

Skipailh Taol Kurun ha dilennidi ar vro a oa bodet evit displegañ roll meuzioù Festival Taol Kurun 2011 : 150 arzour, 10 konter, sonerien, ur grouidigezh keginañ ha sonerezh gant Meuriad Brandivi tro-dro da Catherine Pasco, strolladoù rock (Trouz an Noz ha Roc'k'n Diroll), strolladoù festoù-noz (Hiks, Arvest, Turian), ha 35 frapad buheziñ, 12 staj enno, peadra da dañva buhez bev-buhezek bro Kemperle.

Ganet e 1995

Penaos ober evit saveteiñ skol vihan Kemperle ? "Aozañ ur fest vras" a responte Jean-Yves Cozan. A-drugarez da Ana-Vari Chapalain oa bet aozet ur pezh mell gala gant Denez Prigen, Dan Ar Braz, EV, Yvon Etienne o kanañ war al leurenn ... Ur mor a dud e sal ar C'hoad Kaer, tud ar vro souezhet o welout kement a dud o tifenn ar yezh. Saveteet ar skol, savet savadurioù nevez a-drugarez d'ar maer, tremenet justik dirak an tu kleiz, met a-du krenn evit kavout diskoulmoù padus evit ar c'helenn brezhoneg er vro.

16 vloaz fonnus

Un devezh, tri devezh, teir sizhunvezh ... Hiroc'h-hirañ eo ar festival, prientet a-hed ar bloaz gant ur skipailh 60 den a youl-vat ennañ, tud kentelioù noz Kemperle, tud tomm o c'halon ouzh ar brezhoneg, kerent ar skol. Un tem disheñvel pep bloaz, gant ur bern traoù evit ar vugale (konterien, buhezourien er c'hlasoù, sinema e brezhoneg, kentelioù dañs, keginañ ...). Goude "Sevenadur ha folkloraj" setu tem ar boued hag ar boeson a vo gwelet, labouret, lidet eus an 8 a viz Genver betek ar Merc'her 26 a viz Genver.

Produioù ar vro, produiñ e voued

Diouzh ar c'hiz eo bremañ prenañ boued bio, pe ober war-dro ul liorzh. Met memestra e chom kalz labour d'ober ma vefe ret boueta an dud gant ar boued a zo produet er vro. Aet eo skipailh Taol Kurun da welout marc'hadourien foarioù Molan, Kemperle. Diaes eo d'al labourerien-douar produiñ boued, n'int ket sikouret kalz. An AMAP, Liozhoù Kerbelleg a voueta un 150 bennak a dud. .. war 16 000 annezad. Neuze e vo ur marc'had e sal Koad Kaer Kemperle gant produerien chistr, maligorned, un alambig a vo o labourat dirak ar sal, d'ar Sul 16.

Filmoù, prezegennoù, lennadennoù a vo diaezezet war ar c'hudennoù-se.

Ur bier anvet "Taol Kurun"

Visant a ra war-dro al label "Pur Malt Prod", e Kerien (29). Krouet ez eus bet ur bier anvet "Taol Kurun" gantañ a zo bet tañvaet digwener e-pad an emvod kelaouiñ. Ha n'eo ket fall !

Evit gouzout hiroc'h :

(voir le site)

Cet article a fait l'objet de 1047 lectures.

Youtuberez, kazetennerez evit Ya, Ar Men, an Abp, kelennerez, komedianez, kanerez, konterez, filmourez, ha stourmerez war dachenn ar repuidi, gwirioù mabden, ar brezhoneg, an endro e Breizh. E penn aozadur Kan ar bobl bro Kemperle, kenstrivadeg Priz ar Vugale ha Priz ar Yaouankiz, kenstrivadeg haiku Taol Kurun, bet renerez ar festival pad ugent vloaz....

Gwelout pennadoù all gant Fanny Chauffin

Vos 0 commentaires

Commenter :

Put your name here

ABP

Embann

Nous suivre