S'accréditer |
S'abonner |
Se connecter |
Faire un donS'accréditer |
S'abonner |
Se connecter |
Faire un don
ENEZ AR VERTUZ
N’eo ket dre zegouezh ma ra Youenn OLIER, ur skrivagner puilh maz eus unan, anv eus un « Enezenn » war dalbenn al levr-mañ : Langleiz en deus meret an hevelep dodenn a skiant-faltazi gant « Enez ar Rod ». Dave a ra ivez an aozer da istor hol lennegezh peogwir ez eo bet skrivet un «Enez ar Vertuz » all, « Inis er Vertu », gant Marion e 1790 war enez Edig.
Liesseurt-kenañ eo an oberenn, dic’hortoz a-wechoù, bet skrivet e 1965. Ur seurt heuliadenn da levr Huxley « Brave the World » ez eo,bet troet e galleg dindan an dalbenn "Le Meilleur des Mondes", ur bed mac’homet gant ur Stad dre benn d’an Araokaat Kalvezel. Gellout a reer lenn ur varnadenn hir eus ar romant war AL LIAMM niv. 119, bet graet da vare an embannadur kentañ, roneoskrivet e teir levrenn gant an oberour e-unan e 1965-66. Adwelet ha kresket eo bet e oberenn gant Youenn OLIER nebeut a-raok mont d'an Anaon d'ar 15 a viz Kerzu 2004.
Pemp kevrenn e div levrenn a ya d'ober an oberenn, a zo 674 pajennad enni. Ijinet eo bet ar golo gant Lydie Delile hag ar gartenn gant Nadine Olier.
El levrenn-gentañ en em gaver gant ar poent “Omega ” bet ijinet gant Teilhard de Chardin : ur bed dizenel. En eil lodenn e kaver ur Vreizh oc’h adsevel goude un drouziwezh. Keralen, penntudenn ar romant a zispleg penaos en deus divizet, goude termal hir amzer, da heul kalz a zarvoudoù, dic'hortoz alies, distrujañ ar bed faos-se evit bevañ en unan all, e-lec'h ma ren koulskoude ar marv, ar c'hleñvedoù, ar poanioù diwar ar garantez. Gwellout a reer er bed-se tentadurioù an den a-viskoazh : ar berc'hentiezh, ar gwaskerezh, ur Stad mac'hom oc'h eginañ adarre...
En ur ger ez eo evit gwir ul levr a breder don, war ster an istor pergen, hogen kinniget e stumm ur romant pinvidik ar yezh anezhañ.
Ne vo ket gwerzhet al levr er stalioù levrioù dre ma savfe re uhel priz ar mell oberenn-mañ d'al lennerien.
Dre lizher eta e ranker pourchas "ENEZ AR VERTUZ" : 45 €, e ti Imbourc'h, Kergreven, 29800 Trelevenez.
le la les un de a au des une
Philippe Argouarch
Vidéos