10 embregerezh eus ar vro Vigoudenn o sinañ evit ar brezhoneg

Diwar atiz ar c'hevredad Startijenn ar Vro Vigoudenn hag e brezidant Reun Koupa e oa bet aozet er bloaz-mañ « Gouel ar vro Vigoudenn » d'ar 17 ha d'an 18 a viz Du 2007 Lidañ identelezh ar vro Vigoudenn ha lakaat war wel an oberoù a c'hell pep hini kas da

Diwar atiz ar c'hevredad Startijenn ar Vro Vigoudenn hag e brezidant Reun Koupa e oa bet aozet er bloaz-mañ « Gouel ar vro Vigoudenn » d'ar 17 ha d'an 18 a viz Du 2007

Lidañ identelezh ar vro Vigoudenn ha lakaat war wel an oberoù a c'hell pep hini kas da benn evit diorren ar brezhoneg hag ar sevenadur, sed aze ar pezh e oa pal ar gouel-mañ a vod annezidi ar vro ha kevredigezhioù a bep seurt.

Daou zevezh leun-raz a abadennoù eta a zo bet kinniget d'an dud. D'ar Sadorn, ur brezegenn diwar-benn identelezh Breizh gant ar sokiologour Ronan ar C'hoadig, an eil gant Jaime Ocampo Rangel (luc'hskeudenner tudoniour eus Kolombia) war minorelezhioù all er bed a-bezh hag an trede kinniget gant Serge Duigou, istorour brudet ar vro Vigoudenn, diwar-benn identelezh e gorn-bro. Etre ar Sadorn hag ar Sul e c'helled kemer perzh en abadennoù dañs pe kanañ a oa aozet koulz hag en ur staj brezhoneg kinniget gant Mervent.

D'ar Sul e oa bet daou brantad pouezus. Ur c'hollok da gentañ, ma oa bet pedet tud ar vro e karg eus an touristerezh, ar peskataerezh, al labour-douar, pe c'hoazh ar brezhoneg, da eskemm ha da brederiañ war al liammoù a zo etre an Armerzh hag an Identelezh. Patromed embregerezhioù a zo deuet da lavaret o soñj ivez war ar gounid a c'heller tennañ eus un identelezh kreñv evel hini ar vro Vigoudenn.

Goude ar c'hollok-mañ, an eil darvoud pouezus a oa lid-sinañ an emglev Ya d'ar brezhoneg gant dek embregerezh eus ar vro. Bez' eo ar sinadurioù-se frouezh al labour kaset war-raok gant Reun Koupa, skipailh Startijenn hag Ofis ar Brezhoneg evit kizidikaat an embregerien ouzh ar c'houlzad. Sed amañ a-is roll an dek siner nevez, an holl anezho o tont eus ar gennad prevez, a lakaio neuze listenn hir ar sinerien da greskiñ c'hoazh.

• Studio luc'hskeudennoù Le Lain, Pont-'n-Abad - B. Matignon, kuzulier war ar c'heginañ, Kombrid - Rosa, Chokoladourez, Pont-'n-Abad - Chokoladour Robinet, Pouldreuzig - Baraerezh Le Cleac'h, Pornaleg - Bernez Lebreton, liorzhour, Ploveur - Andre le Boennec, livour kinklour, Penmarc'h - Sant Pêr, M. Guichaoua, Penmarc'h - Leti Breizh, Pont-'n-Abad - Men Lann Du, Ti krampouezh, Pont-'n-Abad