D'ar Gwener 28 a viz Gwengolo 2007 e oa bet sinet e Plouared (22) ar garta Ya d'ar brezhoneg dirak an Ao. Christian Le Fustec, maer, an It. Lena Louarn, prezidantez Ofis ar brezhoneg hag an Ao. Gérard Quilin, kuzulier-departamant ha maer Plounevez-Moedeg, deuet da zileuriañ an departamant.
Fañch an Uhel hag Anjela Duval, douaret o-daou e Plouared, ne vefent ket bet savet a-enep, moarvat, m'o defe gwelet Christian Le Fustec, hag eñ brezhoneger a-vihanik, o kinnig d'ar c'huzul-kêr sinañ Ya d'ar brezhoneg.
En e brezegenn en deus embannet sklaer ar maer e c'hoant da skoazellañ krouidigezh un hentad divyezhek e-barzh ar gumun.
E-touez an 20 ober e c'heller menegiñ ar re bennañ anezho : staliañ plakennoù straed divyezhek ; staliañ ur panellerezh divyezhek e diabarzh hag e diavaez savadurioù an ti-kêr ; brudañ an emglev Ya d'ar brezhoneg e-touez embregerezhioù, stalioù ha kevredigezhioù ar gumun ; reiñ an tu d'an dud da eurediñ e brezhoneg ha reiñ dezho paperennoù melestradurel divyezhek ; kemer perzh e koulzad brudañ ar c'helenn brezhoneg d'an dud deuet ; skoazellañ ha/pe arc'hantaouiñ un hentad divyezhek er gumun. Graet e vo gant an div yezh bep tro ma vo staliet panelloù nevez gant ar gumun ha kinniget e vo da implijidi an ti-kêr stummadurioù evit deskiñ brezhoneg pe gwellaat o yezh.
Sinañ a raio ar gumun ur gevrat kefridi gant an Ofis ivez (ober 28), ar pezh a dalvez e vo kenlabouret war hir dermen, gant an Ofis oc'h ober e labour aliañ hag heuliañ sevenidigezh an oberoù evit kas anezho da benn vat.