Heol, rederien, ur skipailh aozerien skuizh ha laouen, sonerezh Breizh hag Euskadi : kaer e oa an abadenn

Pismigerien a lâro ne oa ket a-walc'h a dud war an hentoù, n'eo ket deuet ar Redadeg da vout poblek da vat. Tud a lâro eo danjerus mont da foetan bro da noz gant tud yaouank un tamm dirollet e Menezioù Are, tud a lâro atav un dra bennak, anat deoc'h...

Met dec'h war ribl lenn Groñvel, e kichen ar vugale o varvouilhat b'an dour, e kichen ar re yaouank o flapiñ pe o tañsal, dec'h e oa gant ur c'hwezh vat, c'hwezh ar spern gwenn, c'hwezh ur yaouankiz oc'h adkavout al lorc'h da vezañ brezhoneger, ar re gozh lorc'h enno da welout ar mor a dicheurtoù mouk ha ruz. C'hwezh un amzer nevez war hentoù ar stourm evit ar brezhoneg. Zoken ma vo hir an hent, zoken ma vo ret stourm c'hoazh, daoust d'an diaesterioù a vo divent, gant komzoù flour Lleuwen kuzhet er vazh-test, gant komzoù flour ar strolladoù sonerezh brezhonegerien o tiwan e pep lec'h... Amzer nevez ar re a youl-vat a oar lakaat o startijenn asambles evit krouiñ ur redadeg, un Dro Menez Are, skolioù e yezh ar vro.